Pa December 17, 2019, Khoti la Apilu ku Rome likasintha chigamuro icho khoti la ŵana likagamula. Khoti la ŵana likeruzga kuti mudumbu munyake uyo wakakana kuti mwana wake ŵamuŵike ndopa, ŵamupoke mwana. Kweni Khoti la Apilu likati mudumbu uyu ŵamuwezgere mwana wake ndiposo likati wakaŵavya mulandu uliwose. Chigamulo ichi ntchakuzirwa chomene chifukwa chizamovwiraso ŵapapi ŵanyake awo Mbakaboni kuti ŵaleke kuŵapoka ŵana ŵawo chifukwa chakuti ŵapapi ŵakana kuti ŵana ŵawo ŵaŵaŵike ndopa.

Mulandu uwu ukamba apo mudumbu withu munyake wakachita ngozi ya galimoto pamoza na mwana wake msepuka wa vyaka 10. Mwana wakapwetekeka ndipo ŵakamutolera ku chipatala. Pakati pajumpha mazuŵa ghatatu, madokotala ghakati mwana uyu wakwenera kuchitika opareshoni. Mudumbu withu wakaphalira madokotala kuti mwana wake ŵangamupa wovwiri uliwose uwo ungakhumbikwa kweni wangazomera yayi kuti mwana wake ŵamuŵike ndopa. Nangauli umoyo wa mwana ukaŵa pangozi chomene yayi, kweni madokotala ghakalembera loya kuti mudumbu uyu wakamupweleleranga yayi mwana wake chifukwa cha ivyo wakagomezganga. Ntheura madokotala ghakatora loya kuti waŵawovwire kuti mwana waŵikike ndopa. Loya uyu wakati mudumbu withu wakumupwelelera yayi mwana wake ndipo wakapempha kuti Khoti limupoke wanangwa wakumusankhira vyakuchita mwana wake. Khoti la ŵana likazomerezga pempho ili, nangauli dango likuŵazomerezga yayi kuchita nthena. Ntheura mudumbu withu wakachita apilu ku Khoti la Apilu.

Khoti la Apilu likati mudumbu withu ni mama muwemi chomene uyo wakupwelelera mwana wake. Khoti ili likatiso “mburunji yayi kuyowoya kuti mama uyu wakupwelelera yayi mwana wake chifukwa chakuti waka wakulondezga ivyo wakugomezga ku chisopa chake.” Khoti ili likamupaso mudumbu uyu wanangwa wake uwo Khoti la ŵana likamupoka.

Nicola Colaianni, uyo wakapelekanga ulongozgi ku Khoti Likuru la Cassation ndiposo uyo ni Purofesa wakuwona vyamalango gha chisopa pa University ya Bari, wakati: “Nkhukolerana navyo ivyo Khoti la Apilu likagamula. Nazizwa chomene na ivyo Khoti la ŵana likagamula. Vikuwoneka kuti ntchakusuzga ku ŵanthu ŵanandi kuti ŵaŵe na wanangwa wakusopa ndipo ntchakusuzga chomene ku Ŵakaboni ŵa Yehova.”

Mubali Christian Di Blasio, uyo wakulaŵilira Dipatimenti Yakuthandazga Nkhani ku Italy, wakuti: “Tikuwonga chomene Khoti la Apilu pakusintha chigamulo icho chikapelekeka chifukwa cha kutinkha waka chisopa. Ŵakaboni ŵa Yehova ŵakupwelelera chomene ŵana ŵawo ndipo ŵakuwonga chomene madokotala agho ghakupeleka wovwiri wakukolerana na njuŵi yawo.”

Ivyo Khoti lagamula apa vyalongolerathu kuti ŵabali na ŵadumbu ŵithu ŵali na wanangwa wakusankhira ŵana ŵawo wovwiri wa ku chipatala. Tikuwonga Yehova Chiuta withu, pa kutovwira pa mulandu uwu, chifukwa viwovwirenge ŵabali na ŵadumbu ŵithu kusankha wovwiri wa munkhwala uwo ukukolerana na njuŵi yawo yakusambizgika na Baibolo.—Salimo 37:28.