Nangauli pasono nkhani ya vya chuma kweniso ya vyaumoyo yikwenda makora viŵi yayi, kweni ntchito ya kusamuska ofesi ya munthavi ya Ŵakaboni ŵa Yehova yikulutilira mu msumba wa Bologna. Pa September 5, 2020, pakachitika chinthu chapadera chomene, nyumba yakwamba ya kugonamo yikamalizgika kuzengeka. Ntchito ya kusamuska ofesi yiphya iyi yikwenera kuzakamara cha kuumaliro wa chaka cha 2023.

Komiti ya Vyakuzenga iyo muli ŵabali 5, ndiyo yikulaŵilira mulimo wa kusamuska ofesi uwu. Kampani yinyake ndiyo yikapika ntchito yakuti yipange pulani na kuzenga nyumba ya kugonamo ndipo yikamba kuchita ntchito iyi mu September 2018.

Mu 2019, makampani ghanandi mu charu ichi ghakasangana na suzgo la vya chuma. Ivi vikapangiska kuti ntchito iyi yiyime dankha. Chakukondweska ntchakuti panyengo iyi, viliŵa vya nyumba iyi vikaŵa kuti vyamara kuzengeka, ndipo ivi vikapangiska kuti ntchito yileke kuyima kwa nyengo yitali.

Kukwambilira kwa chaka cha 2020, muliri wa COVID-19 ukasuzga chomene kumpoto kwa Italy, ndipo msumba wa Bologna nawo ukakhwaskika. Ŵamazaza ŵa mu msumba uwu ŵakalekeska dankha ntchito zinyake, kusazgapo na ntchito zakuzenga. Ndipouli, pati pajumpha waka mwezi umoza, ŵamazaza ŵakazomerezga kuti ŵanthu ŵangambaso kugwira ntchito chikuru ŵakulondezga ulongozgi wa umo ŵangajivikililira wakufuma ku ŵa vyaumoyo kweniso ku gulu lithu.

Mubali Paolo Comparato, uyo njumoza wa ŵabali ŵa mu Komiti ya Vyakuzenga, wakuti: “Tikuwonga Yehova chifukwa cha ntchito yakukondweska iyi. Kwambura wovwiri wake wa mzimu utuŵa, mphanyi tikalutizga yayi ntchito iyi chifukwa cha masuzgo agho tikasangana nagho.”

Cristina Dallacasa, uyo ni mulara wa kampani iyo yikuzenga ofesi iyi, wakuti: “Tikuwonga chomene Ŵakaboni ŵa Yehova kuti ŵakasankha ise kuti ndise tiŵazengere nyumba yakuzirwa chomene kwa iwo kuno ku Italy. Tikugwira nawo ntchito mwakukolerana, ndipo ivi vyatovwira kuti titonde masuzgo agho tikasangana nagho pa ntchito yithu yakuzenga. Ŵakaboni ŵa Yehova ŵakuŵikapo mtima chomene pa ntchito zawo, ŵakuwoneseska kuti awo ŵakugwira ntchito mbakuvikilirika. Chakukondweska chomene ntchakuti pasono nawamo kuti gulu ili likuchita vinthu mwakugomezgeka. Ichi ntchakuzirwa, chomene panyengo iyi apo vinthu vili makora yayi, ndipo ndalama njakusuzga kuyisanga.”

Tili na chigomezgo chose kuti Yehova walutilirenge kovwirapo pa ntchito iyo yipangiskenge kuti zina lake lichindikike.—Salimo 127:1.