Nga umo viliri mu vyaru vinandi mazuŵa ghano, charu cha Italy chikuzomerezga munthu kukana kunjira usilikari chifukwa cha njuŵi yake. Kweni ndimo vikaŵira yayi kumanyuma uku. Pasono ŵanthu ŵali na wanangwa uwu chifukwa cha kujipata kwa Ŵakaboni ŵa Yehova.

Vyaka vinandi pamanyuma pa Nkhondo Yachiŵiri ya pa Charu Chose, mu charu cha Italy mukaŵa dango lakuti mwanalume waliyose wakwenera kuluta ku nkhondo. Mu 1946, nkhondo yikati yamara waka, mu charu chose cha Italy mukaŵa Ŵakaboni ŵa Yehova 120. Kweni apo ŵanthu ŵanandi ŵakajipelekanga kwa Yehova, chiŵelengero cha ŵanyamata awo ŵakakananga kunjira usilikari chifukwa chakuti ŵakaŵa Ŵakaboni ŵa Yehova chikasazgikirangaso. Ŵakakananga chifukwa cha kulondezga fundo za mu Baibolo nga nkhuleka kunjilirapo pa vya charu, kuleka kuchita nkhaza, na kutemwa muzengezgani wako.

Kafukufuku uyo ofesi ya munthavi ya Italy yikachita mwasonosono apa, walongora kuti ŵabali pafupifupi 14,180 awo ŵakeruzgika kuti ŵakagwire jele chifukwa chakukana kunjira usilikari ŵachali ŵamoyo. Para tingasazga pamoza vyaka vyose ivyo waliyose wakeruzgika kuti wagwire jele, ndikuti ŵabali ŵithu ŵakeneranga kukhala mu jele vyaka 9,732. Ivi vikeneranga kuchitika pakati pa vyaka vya 1965 na 1998.

Sergio Albesano, uyo ngwakuwona vya mbiri ku Turin, Italy, wakati Ŵakaboni ŵa Yehova “ŵachinyamata ndiwo ŵakaŵa ŵanandi chomene pa ŵanthu awo ŵakajalirika chifukwa cha kukana kunjira usilikari.” Wakati wakuwonga chomene chifukwa chakuti ŵanyamata aŵa ŵakaŵa ŵambura kusunkhunyika, ndipo “ŵakawovwira chomene kuti ŵanthu ŵanandi ku Italy ŵamanye vya suzgo ilo likaŵapo.”

Giulio Andreotti, uyo wakaŵa Nduna Yikuru, kweniso wakawonangaso vya chivikiliro cha charu cha Italy m’ma 1960, wakaghanaghana kuti wakumane na ŵanyake mwa Ŵakaboni awo ŵakajalirika kuti wapulikiske chifukwa icho ŵakukanira kunjira usilikari. Pamanyuma wakalemba kuti: “Nkhakhorwa nati nawona kuti ŵakaŵa ŵambura kusunkhunyika pa vigomezgo vya chisopa chawo kweniso kuti ŵakakananga kuchitako ndyali. Vikachitika mwa ngozi waka yayi kuti ŵaŵe ŵakukhora na kukana kunjira usilikari na kuzizipizga vyaka vinandi ivyo ŵakaŵira mu jele.”

Dango lakwamba ilo likazomerezganga munthu kukana kunjira usilikari ŵakalizomerezga mu 1972. Chachitima ntchakuti, nangauli dango likazomerezganga kuti munthu wangapika ntchito zinyake, kweni ŵasilikari ndiwo ŵakalaŵiliranga ntchito izi, icho chikaŵaso chakusuzga ku ŵabali ŵithu.

Paumaliro, pa July 8, 1998, boma la Italy likazomerezga dango liphya la kuwona vya ntchito izo zingapika kwa ŵanthu awo ŵakukana kunjira usilikari ndipo dango ili likalaŵilirikanga na ŵasilikari yayi. Iyi yikaŵa nkhani yakukondweska chomene ku Ŵakaboni ŵa Yehova. Mu August 2004, charu cha Italy chikazomerezga dango linyake lakuti chaleka kuchichizga ŵanthu kunjira usilikari kwamba mu January 2005.

Ŵakaswiri ŵanandi ŵakuwonga chomene Ŵakaboni ŵa Yehova pakovwirapo kuti malango gha charu ichi ghasinthe. Yumoza wawo ni Sergio Lariccia, uyo ni loya kweniso wakaŵa Purofesa wakuwona vya malango pa Sapienza University ku Rome. Wakati: “Mu nyengo yakale awo ŵakalongozganga ŵasilikari pa nkhani yakusopa ŵakatenge, kukana kunjira usilikari ndikuti ‘ukuyuyura charu chako, ndipo vikukolerana yayi na dango la Chikhristu lakuti titemwanenge, kukana usilikari ni wofi waka.’ Kweni chifukwa chakuti Ŵakaboni ŵa Yehova ŵakaŵa ŵakukhora pa nkhani ya kukana kunjira usilikari, vikawovwira chomene kuti malango kweniso kaghanaghaniro ka ŵanthu visinthe ku Italy.”

Ivyo ŵabali ŵithu ŵakachita vikawovwira chomene padera pakusintha waka malango gha mu charu cha Italy. Ŵalinda ŵa jele ŵanandi ŵakazgoka Ŵakaboni ŵa Yehova ŵati ŵawona umo Ŵakaboni ŵakachitiranga vinthu na ŵakayidi ŵanyawo. Yumoza wawo, Giuseppe Serra, wakuti: “Ivyo ŵakachita Ŵakaboni ŵanyamata ŵara vikanifika pamtima chomene . . . lekani nkhamba kusambira Baibolo.” Munthu uyu wakazgoka Kaboni mu 1972. (Wonani bokosi ilo lili pasi apa.)

Tikukondwa chomene chifukwa cha chiyelezgero chiwemi kweniso chikanga icho ŵabali aŵa pamoza na mbumba zawo ŵakalongora ku Italy, kweniso ŵabali na ŵadumbu ŵanyake pa charu chose, awo ŵakulondezga mwakupwelelera chomene dango lakuti “ŵazamusambiraso nkhondo chara.”—Yesaya 2:4.