Kukwambilira kwa July 2020 ku Kyushu, Japan, kukalokwa chivula chikuru icho chikapangiska kuti maji ghatutuke kweniso charu chilindimukenge. Ivi vikapangiska kuti ŵabali na ŵadumbu ŵanandi mu misumba ya Minamata na Hitoyoshi mu chigaŵa cha Kumamoto kweniso ŵabali na ŵadumbu ŵa mu msumba wa Omuta mu chigaŵa cha Fukuoka, ŵasuzgike chomene. Mubali na mudumbu yumoza ndiwo ŵakapwetekeka pachoko waka, kweni palije Kaboni wa Yehova uyo wali kufwapo. Ndipouli, nyumba za ŵabali na ŵadumbu zakukwana 48 pamoza na Nyumba za Ufumu ziŵiri zikanangika. Nakuti Nyumba za Ufumu zinyake ziŵiri zikanangika chifukwa cha kulindimuka kwa charu.

Komiti Yakovwira Para Kwachitika Soka iyo yikulaŵilira ntchito iyi ku Kyushu na ku Okinawa, iyo Ofesi ya Munthavi ya Japan yikapanga kuti yiwovwirenge awo ŵakhwaskika na muliri wa COVID-19, yikovwira chomene ŵabali ŵithu wose awo ŵakhwaskika na kututuka kwa maji. Ŵabali awo ŵakwimira Dipatimenti ya Vyakuzenga kweniso ŵalaŵiliri ŵa dera ŵa mu chigaŵa ichi, ŵakovwira mwaluŵiro chomene ŵabali ŵithu .

Tikulomba Yehova, “Chiuta uyo wakutisanguluska na kutipa nkhongono zakuzizipizgira,” kuti walutilire kovwira ŵabali na ŵadumbu awo ŵakhwaskika na suzgo ili.—Ŵaroma 15:5.