OCTOBER 4, 2022
JAPAN
Takwaniska Vyaka 50 Tikupulinta Mabuku ku Ofesi ya Munthavi ya Japan
Chaka cha 2022 chakwaniska vyaka 50 kufuma apo tikambira kupulinta mabuku ku ofesi ya munthavi ya Japan.
M’ma 1950 na 1960, ŵabali na ŵadumbu pamoza na ŵamishonale 70, ŵakaŵikapo mtima chomene pa ntchito ya kupharazga ku Japan, ndipo ivi vikapangiska kuti chiŵelengero cha ŵapharazgi chikure chomene. Chifukwa cha kusazgikira kwa ŵanthu awo ŵakakhumbanga mabuku ghakulongosora Baibolo mu Chijapanizi, tikawona kuti ofesi ya munthavi ya Japan yambe kupulinta magazini gha Gongwe la Mulinda na Wukani!
Pa Ungano wa Mitundu Yose wakuti “Peace on Earth” ku Tokyo mu October 1969, Mubali Nathan H. Knorr wakapharazga kuti ofesi ya munthavi iyo yipurintengeso mabuku yizengekenge ku Numazu, kufupi na Mount Fuji.
Ŵabali ŵakunozga mashini gha kupulintira mu vyaka vyakwambilira ofesi yati yakhazikiskika waka ku Numazu, Japan
Ntchito yakuzenga yikamba mu January 1972. Kufika pa August 15, 1972, ŵakaŵa kuti ŵamara na kuŵikira mashini ghakuru ghakupulintira, na mashini ghanyake ghakukhumbikwa pa ntchito ya kupulinta. Magazini yakwamba kupulintika pa ofesi yiphya iyi, yikaŵa Wukani! ya October 8, 1972, mu Chijapanizi. Uyo wakachitangako mulimo wa kupulinta pa nyengo yira wakati, “Nkhathiska masozi ghachimwemwe nati nawona kakwamba katoni yakuzura na magazini agho ghapulintika waka sono, kuti ghatumizgike ku mipingo.”
Mu 1982, ofesi ya munthavi ya Japan yikasamukira ku nyumba ziphya izo zikazengeka ku Ebina. Nyumba izi zikaŵa zikuru maulendo ghatatu kuyaniska na za ku Numazu ndipo kukaŵa mashini ghaphya agho ghakapulintanga mwaluŵiro chomene. Padera pa kupulinta magazini gha Gongwe la Mulinda na Wukani!, ofesi iyi yikambaso kupulinta Mabaibolo gha Malemba Ghakupatulika mu Mang’anamuliro gha Charu Chiphya. Ŵakambaso kupulinta mabuku ghakulongosora Baibolo mu viyowoyero vyakujumpha 200.
Chithuzi cha sonosono cha ŵabali ŵithu awo ŵakugwira uko ŵakupulinta mabuku ku Ebina, Japan, ŵakunozga vinyake na vinyake mu mashini ghakupulintira
Pasono ofesi ya ku Japan yikupulinta magazini gha Gongwe la Mulinda na Wukani! ghakujumpha 13.2 miliyoni mwezi uliwose. Kufuma mu 2013, ofesi iyi yapulinta Mabaibolo ghakujumpha 20 miliyoni mu viyowoyero vyakujumpha 100 na kughatumizga mu vyaru vyakujumpha 50.
Mu 1972, ku Japan kukaŵa ŵapharazgi pafupifupi 13,000. Pamanyuma pa vyaka 50, mu 2022, chiŵelengero ichi chakwera na kujumpha 213,000. Ndise ŵakukondwa chomene kuwona umo ofesi iyi yakhozgera ntchito ya Ufumu ku Japan kweniso pa charu chose chapasi.—Mateyu 28:19, 20.