Pa May 12, 2023, Khoti la Apilu ku Kenya likapeleka chigamulo chakuzirwa chomene icho chili kuvikilira wanangwa wakusopa wa ŵana ŵasukulu mu charu ichi. Nangauli dango ku Kenya likuyowoya kuti palije uyo wakwenera kuchichizgika kuchita vinthu ivyo vikukolerana yayi na ivyo wakugomezga, kweni kwambira waka mu chaka cha 2015 ŵana ŵasukulu 41 awo Mbakaboni ŵa Yehova ŵakafumiskikangapo pa sukulu chifukwa chakukana kunjilirapo pa vyakuchitika vya visopa vinyake.

Chigamulo cha Khoti la Apilu ichi, chili kwiza chifukwa cha nkhani yinyake iyo yikachitika mu 2017. Ŵana ŵasukulu 9 awo Mbakaboni ŵa Yehova, mwantchindi ŵakakana kunjilirapo pa vinthu ivyo ŵana ŵasukulu ŵanyake awo mbavisopa vyakupambanapambana ŵakachitiranga pamoza pa sukulu. Chifukwa cha ivi mbwenu nkhani iyi yikatolekera ku khoti. Mu 2019, khoti lichoko likadumura kuti sukulu iyi yikananga yayi kuchichizga ŵana ŵa sukulu awo Mbakaboni ŵa Yehova kunjilirapo pa vyakuchitika vya pa sukulu. Kweni pa May 12, 2023, Khoti la Apilu likasanga kuti khoti lichoko “likaswa wanangwa uwo ŵana ŵasukulu aŵa ŵali nawo nga wanangwa wakusambira sukulu kweniso wanangwa wakuvikilirika mwantchindi.” Kweniso likayowoya kuti kuchichizga ŵana ŵasukulu awo Mbakaboni ŵa Yehova kuti ŵanjilirengepo pa vyakuchitika vya visopa vinyake, ni “nkhaza kweniso kuswa malango gha boma.” Mweruzgi yumoza uyo ŵakadumurako mulandu uwu wakayowoya kuti: “Ivyo khoti ladumura apa vizamovwiraso masukulu ghanyake munthazi para ŵasangana na suzgo lakuyana waka ili.”

Ivyo khoti likadumura apa, vikukolerana chomene na ivyo Unduna wa Vyamasambiro ukayowoya ku ŵalaraŵalara ŵa ma sukulu kuti ŵakwenera kuchindika ŵanangwa wakusopa uwo ŵana ŵasukulu wose ŵali nawo. Chifukwa cha chigamulo ichi, charu cha Kenya pasono ntchimoza mwa vyaru ivyo vili kupereka chigamulo icho chili kuvikilira wanangwa wa ŵana ŵasukulu awo Mbakaboni ŵa Yehova. Vyaru vinyake ivyo vili kuchitaso nthena ni Malaŵi na Rwanda.

Ŵawukirano ŵithu wose ku Kenya kweniso pa charu chose chapasi awo ŵakulongora chikanga, ŵakwenera kumanya kuti Yehova wakukondwa nawo chomene apo ŵakuŵikapo mtima kukhozgera kusopa kutuŵa!—Zintharika 29:25.