Ŵanthu 15 ŵa mu wupu wa United Nations Human Rights Committee (CCPR) ŵakakolerana chimoza pa kususka boma la Kyrgyzstan chifukwa cha kuswa wanangwa wa Ŵakaboni ŵa Yehova wa kusopa mwawanangwa mu vigaŵa vitatu vya charu ichi. Wupu wa CCPR ukalemba chikalata cha mapeji 7 ndipo ukadumura kuti boma la Kyrgyzstan “liŵalipire mwakwenelera” Ŵakaboni na “kuchita vyose vyakukhumbikwa kuti vyanthena vizakaleke kuchitikaso kunthazi.” Aka nkhachiŵiri kuti wupu wa CCPR ususke boma la Kyrgyzstan chifukwa cha kuswa wanangwa wa Ŵakaboni.

Gulu lakwamba la Ŵakaboni ŵa Yehova ku Kyrgyzstan likalembeskeka ku boma mu 1993, ndipo laŵa gulu lakuzomerezgeka kwamba mu 1998. Ntheura kwa vyaka vinandi, Ŵakaboni ŵakaŵa na wanangwa wakusopa mu charu ichi. Ndipouli, kwa vyaka vyakujumpha 10, wupu wa State Committee on Religious Affairs (SCRA) ukakana kuzomerezga mawupu ghanyake ghatatu gha Ŵakaboni ŵa Yehova ku vigaŵa vya Osh, Naryn, na Jalal-Abad ivyo vili kumwera kwa charu ichi. Nangauli ŵabali ŵakayezgeska kupempha mwakuwerezgawerezga, kweni palije icho chikachitika. Wupu wa SCRA ukati wakana kuzomerezga mawupu gha Ŵakaboni ŵa Yehova mu vigaŵa ivi, ŵabali na ŵadumbu ŵakazomerezgekanga yayi kuchita vinthu vyakukhwaskana na kusopa kwawo, kuchita maungano gha mpingo na gha dera, kweniso kuŵa na malo ghawo ghakusoperapo. Ntheura wupu wa CCPR ukasanga kuti boma la Kyrgyzstan likachita vinthu mwakutemwera ndipo likaŵachitira vyambura urunji Ŵakaboni ŵa Yehova mu vigaŵa vitatu ivi chifukwa waka cha ivyo ŵakugomezga.

Wupu wa CCPR ukukhazga kuti ŵamazaza ŵa ku Kyrgyzstan “ŵachite vyose ivyo ŵangafiska kuti vyanthena vizakaleke kuchitikaso kunthazi.” Boma la Kyrgyzstan lili na mazuŵa 180 ghakuti lizakapeleke zgoro ku wupu wa CCPR lakukhwaskana na ivyo lasankha kuchita pa nkhani iyi.

Tikumanya yayi usange ŵamazaza ŵa ku Kyrgyzstan ŵapulikirenge ivyo wupu wa CCPR wadumura na kuzomerezga kuti ŵabali na ŵadumbu ŵithu mu vigaŵa ivi ŵasopenge mwawanangwa. Ndipouli, awo ŵakuwona vya wanangwa wa ŵanthu ku Forum 18 ŵakasandanga mwakupwelelera umo vinthu vikwendera ndipo ŵakapeleka lipoti lakuti wupu wa SCRA “ukasulako waka chigamuro chakuyana waka icho wupu wa United Nations ukapelekeka mu 2019.”

Kwali boma la Kyrgyzstan lipulikirenge ivyo laphalirika na wupu wa United Nations kwali yayi, tikumanya kuti Yehova wakumanya ivyo ŵabali na ŵadumbu ŵithu ŵakukumana navyo ku Kyrgyzstan. (Salimo 37:18) Adada ŵithu ŵakuchanya ŵalutilirenge kuŵatumbika chifukwa cha kugomezgeka na chikanga icho ŵakulongora.—Salimo 37:28.