Kukwambilira kwa March 2023 ku Riga, Latvia, kukachitika chiwoneskero cha mabuku ndipo pakaŵa ŵanthu ŵakujumpha 21,000. Aka kakaŵa kanambara 7 kuti ŵabali na ŵadumbu ŵachiteko chiwoneskero mu charu ichi. Ndipo chiwoneskero ichi chikaŵa chakwamba kufuma apo muliri wa COVID-19 ukambira. Ŵabali na ŵadumbu ŵithu ŵakakondwa chomene kuwoneska Baibolo la Malemba Ghakupatulika mu Mang’anamuliro gha Charu Chiphya ilo likafuma mu 2020 mu chiyowoyero cha Chilatvia.

Mu kanyumba kakuwoneskeramo mabuku ŵakaŵikapo mtima kuti ŵanthu ŵamanye zina la Chiuta lakuti Yehova. Ŵalendo ŵakazizwa kumanya kuti zina la Yehova likamba kusangika kakwamba mu Baibolo la chiyowoyero cha Chilatvia ilo likang’anamulika mu 1689. Kweniso ŵakazizwa apo ŵakaŵawoneskanga mu Baibolo la mu Mang’anamuliro gha Charu Chiphya kuti ŵali kuwezgeramo zina la Chiuta lakuti Yehova mu malo ghakujumpha 7,000.

Kweniso ŵanji ŵakazizwa pakuwona umo Baibolo ili, lili kupangikira. Munthu munyake uyo wakugwira ntchito ku kampani yakusindikizga mabuku wakati Baibolo ili, lili kupangika mwapachanya chomene. Ndipo wakati ntchakuwonekerathu kuti lili kupangika kuti zuŵa lililose ŵanthu ŵaliŵerengenge.

Munthu munyake ŵati ŵamupa Baibolo, wakakondwa chomene chifukwa cha chiyowoyero chipusu chambura kusuzga kuŵerenga icho ŵali kugwiliskira ntchito mu Baibolo la Mang’anamuliro gha Charu Chiphya ili. Iyo wakalongosora kuti nyengo yinyake wakayezgapo kuti waŵerenge Baibolo kweni wakalutilira yayi chifukwa mazgu ghake ghakaŵa ghakusuzga kupulikiska. Kweni sono ngwakunweka kukaŵerenga Baibolo la Mang’anamuliro gha Charu Chiphya ili pamoza na mwana wake msungwana. Pamanyuma pa mazuŵa ghatatu gha chakuchitika ichi, ŵabali na ŵadumbu ŵakagaŵira Mabaibolo ghakukwana 130 gha Mang’anamuliro gha Charu Chiphya mu Chilatvia.

Ŵabali na ŵadumbu awo ŵakachitako mulimo wakuwoneska Baibolo uwu ŵakakondwa chomene kovwira ŵanji kumanya vya Baibolo kweniso uyo ni Mweneko. Mwakukondwa mudumbu munyake wakayowoya kuti: “Nkhakwamba kovwira ŵanthu ŵanandi nthena kumanya zina la Chiuta lakuti Yehova mu mazuŵa ghachoko waka.”

Pasono ku Latvia kuli ŵapharazgi ŵakujumpha 2,100. Tikukondwa kuti iwo pamoza na ŵanji awo ŵakunweka na Mazgu gha Chiuta wakusanga chandulo na Baibolo lipusu ili na kuŵa paubwezi na Yehova.—Yakobe 1:17.