Pa June 7, 2022, Khoti Lakuwona vya Wanangwa wa Ŵanthu ku Europe likapeleka chigamuro chake pa mulandu wa Mubali Stanislav Teliatnikov wa ku Lithuania, uyo wakakana kunjira usilikari chifukwa cha njuŵi yake. Khoti ili likati wanangwa wakuti munthu wangakana kunjira usilikari chifukwa cha njuŵi yake ngwakuzomerezgeka kuyana na Dango 9 la European Convention on Human Rights (wanangwa wa kuyowoya maghanoghano ghako, kulondezga njuŵi yako, na wanangwa wa chisopa). Ntheura boma la Lithuania likasangika lakubuda chifukwa likaswa dango la wupu uwu ndipo likaphalirika kuti limulipire Stanislav ndalama zakukwana madola 3,196 gha ku America.

Pafupifupi vyaru vinandi ivyo vili mu wupu uwu vili kwamba kupeleka mwaŵi wa ntchito zinyake padera pa usilikari para mphakukhumbikwa. Stanislav wati wachemeka kukanjira usilikari, wakapempha kuti wagwire ntchito zinyake zambura kukolerana na usilikari kuyana na dango la wupu uwu. Kweni charu cha Lithuania chilije mwaŵi wanthena uwu. Mu chigamuro icho khoti ili likapeleka ku charu cha Lithuania, icho chikuyana waka na icho likapeleka ku vyaru nga Armenia, Azerbaijan, na Turkey, khoti ili likawelezgapo kuti vyaru vyose ivyo vili mu wupu uwu vikwenera kuŵa na ntchito zinyake padera pa usilikari. Ntchito izi zikwenera kuleka kuŵa waka nga ntchilango, ziŵe zambura sankho ndipo zilongorenge nadi kuti zikukolerana yayi na usilikari.

Ku Armenia ŵali kwambapo kupeleka ntchito zanthena izi. Ŵachinyamata awo ŵakana kunjira usilikari chifukwa cha njuŵi zawo ŵangatumika ku ntchito zinyake izo zingawovwira pa chitukuko cha mu chigaŵa chawo.

Tikugomezga kuti boma la Lithuania nalo lipulikirenge chigamuro cha khoti ili na kwamba kupeleka mwaŵi wa ntchito zinyake padera pa usilikari, ivyo viwovwirenge chomene ŵabali ŵithu na vigaŵa ivyo ŵakukhala. Apo tikulindilira kuti ivi vichitike, tikumanya kuti Yehova walutilirenge kulongozga na kovwira ŵabali ŵithu ku Lithuania.—Chitengero cha Yeremiya 3:25.