Pa May 27, 2023, malo ghaphya ghakuchitirako sukulu ŵakaghapatulira ku Antananarivo, Madagascar, ndipo ungano uwu ukachitikira pa Nyumba ya Ufumu yapafupi. Mubali Kenneth Cook, Jr., uyo ngwa mu Wupu Wakulongozga ndiyo wakayowoya nkhani yakujulira malo agha iyo yikaŵa na mutu wakuti: “Nyumba Iyo Yikulumba Yehova.” Zuŵa lakulondezgapo, ungano wapadera ukachitika pa malo ghakuchitirapo ungano ndipo ŵanthu ŵakujumpha 45,000 ŵakategherezga.

Kwambira mu December 1999, sukulu zikachitikiranga ku ofesi ya munthavi ya Madagascar. Kweni mwapachokopachoko malo ghakamba kuchepa chifukwa ŵabali na ŵadumbu ŵanandi ŵakajipelekanga kuti ŵakanjire sukulu izi. Mu July 2020, pakasangika malo ghakuru masikweya mita 1,348 agho ghakaŵa pa mtunda wakuti munthu wangenda pasi kufuma ku ofesi ya munthavi ndipo malo agha ghakagulika. Pamanyuma, mulimo wakuzenga sukulu ukambika. Nangauli pakaŵa masuzgo chifukwa cha muliri wa COVID-19, kweni mulimo uwu ukamara pati pajumpha vyaka viŵiri. Pa malo agha pali kuzengeka nyumba ziŵiri, nyumba yinyake ndimo mukuchitikira sukulu, ndipo yinyake ndimo mukugona ŵana ŵasukulu na ŵasambizgi ŵawo. Sukulu ya Ŵapharazgi ŵa Ufumu kweniso Sukulu ya Ŵalaŵiliri Ŵadera na Ŵawoli Ŵawo, zose zichitikirenge pa malo gheneghagha.

Apo ŵabali na ŵadumbu ŵakulutilira kusambira sukulu izi, ivyo ŵakusambira viwovwirenge ŵabali na ŵadumbu aŵa kulongosora “vinthu vyauzimu na mazgu ghauzimu.”—1 Ŵakorinte 2:13.