Komiti ya Munthavi ya Malawi yili kunozga ndondomeko yakuti maungano gha mpingo ghaŵikikenge pa TV na pa wayilesi. Ŵanthu ŵanandi ŵakutegherezga maungano agha kusazgapo na awo Mbakaboni yayi. Ku Malawi kuli Ŵakaboni ŵa Yehova ŵakujumpha 100,000. Kweni ŵenecho ŵa ma TV na mawayilesi ŵakusachizga kuti ŵanthu ŵakujumpha 2 miliyoni ŵakuwonelera TV kuumaliro wa sabata yiliyose, ndipo ŵanthu ŵakujumpha 8 miliyoni ŵakutegherezga wayilesi.

Nga umo viliri mu vyaru vinyake, ŵabali ŵithu ku Malawi ŵakuwungana mu Nyumba za Ufumu yayi pasono chifukwa cha muliri wa COVID-19. Pafupifupi mupharazgi waliyose wali na TV panji wayilesi. Ndondomeko iyi, yawovwira awo ŵangafiska yayi kusanga maungano kwizira pa Intaneti panji kuchita maungano kwizira pa pulogiramu ya pa kompyuta.

Maungano agha ghakuchitika mu Chichewa, chiyowoyero icho chikuyowoyeka na ŵanthu ŵanandi mu charu ichi. Maungano agho ghakuŵikika pa TV ghakung’anamulika mu chiyowoyero cha mawoko cha ku Malawi. Padera pa nkhani ya chisanisani, ŵanthu ŵakuŵa na mwaŵi wakuwonelera mavidiyo ghithu panji kupulikizga madirama gha nkhani za mu Baibolo. Kuumaliro wa maungano agha, ŵanthu ŵakuchiskika kuti ŵalute pa jw.org kuti ŵamanye vinandi kwizira mu viyowoyero vinyake.

Ndondomeko iyi yawovwiraso ŵanthu awo ŵakawonanga mwakubudika Ŵakaboni ŵa Yehova. Munthu munyake wakalemba kuti : “Nategherezga upharazgi winu pa wayilesi mu masabata agho ghajumpha. Upharazgi winu wanovwira kusanga mazgoro gha vinthu vya utesi ivyo ŵanthu ŵakumuyowoyerani. Upharazgi winu ukupambana chomene na upharazgi wa visopa vinyake, ukutifika nadi pa mtima.” Mwanalume uyu pamoza na banja lake ŵali kwamba kusambira Baibolo na Ŵakaboni ŵa Yehova.

Augustine Semo, uyo wakulaŵilira Dipatimenti yakuthandazga nkhani ku Malawi, wakuti: “Ndondomeko iyi yawovwira chomene kuti ŵabali ŵalutilire kusopa Chiuta. Yawovwiraso kuti awo Mbakaboni yayi ŵamanye fundo za mu Baibolo izo tikusambira. Tikugomezga kuti para tazakayambaso kuwungana mu Nyumba za Ufumu kuno ku Malawi, ŵanthu ŵanandi ŵazamwamba kuwungana nase.”

Ndise ŵakukondwa chomene kuti Ŵakaboni ŵanyithu kweniso ŵanthu ŵanyake ŵakulutilira kusopa Yehova munyengo yakusuzga iyi. Tikuwonga chomene ‘muzga wakugomezgeka’ uyo wakuwoneseska kuti waliyose wakupokera chakurya chauzimu.—Mateyu 24:45.