LILONGWE, Malawi—Pa May 3, 2017, ŵana ŵaŵiri ŵa Ŵakaboni ŵa Yehova, Aaron Mankhamba wa vyaka 18, na Hastings Mtambalika wa vyaka 15, ŵakazomerezgeka kuti ŵambireso kusambira pa Khombe Primary School. Ŵana aŵa ŵakaŵachimbizga pa sukulu iyi chifukwa ŵakakana kwimba sumu ya fuko. Ŵakaŵakanizga kusambira kwamba pa February 13, 2017. Ŵakaŵazomerezga kwambiraso kusambira ŵapapi ŵa ŵana aŵa kweniso awo ŵakwimira ofesi ya Ŵakaboni ŵa Yehova mu charu ichi, ŵati ŵakumana na ŵalara ŵa pa sukulu iyi.

Awo ŵakwimira ofesi ya Ŵakaboni ŵa Yehova ŵakaŵa na makalata ghaŵiri ghakufuma ku boma la Malaŵi agho ŵakalongora ŵalara ŵa sukulu iyi. Kalata yinyake ya 1997, yikati Ŵakaboni ŵa Yehova mu charu ichi mbakuzomerezgeka kuleka kwimbako sumu ya fuko. Yinyake ya 2017, yikati ŵasambizgi ŵakwenera kuchindika wanangwa wakusopa wa ŵana ŵa sukulu.

Hastings wakati ŵakazomerezgeka kwambiraso kusambira pa nyengo iyo ŵakaŵa pafupi kulemba mayeso. Wakati: “Tikafipanga mtima chomene kuti titondekenge kulemba mayeso chifukwa ghakulembeka waka kamoza pa chaka.” Mu charu ichi, usange wafelura mayeso ndikuti ukwenera kuwerezgaso kilasi ilo.

A Augustine Semo, muyowoyeri wa Ŵakaboni ŵa Yehova ku Malawi, ŵakati: “Ŵana aŵa ŵakondwa chomene chifukwa ŵalara ŵa sukulu iyi ŵachindika wanangwa wawo wakusopa. Tikuwonga chomene ŵalara ŵa sukulu pakuzomerezga ŵana aŵa kwambiraso kusambira kweniso chifukwa cha kuchindika wanangwa wakusopa.”

Mungayowoya na:

International: David A. Semonian, Ofesi ya Chimanyisko, +1-845-524-3000

Malawi: Augustine Semo, +265-1-762-111