Pa August 8, 2021, Mubali Mark Hutchinson, uyo ngwa mu Komiti ya Munthavi ya Malawi, wakafumiska buku la mu Baibolo la—Makani Ghawemi Umo Wakalembera Mateyu mu Chiyowoyero cha Mawoko cha ku Malawi. Buku la mu Baibolo ili ndakwamba kufumiskika mu Chiyowoyero cha Mawoko cha ku Malawi.

Buku la mu Baibolo ili likafumiskika mu pulogiramu iyo yikajambulikirathu ndipo ŵapharazgi mu chigaŵa chose cha ofesi ya munthavi ŵakachita kuwonelera waka kwizira pa intaneti. Pulogiramu iyi yikaŵikikaso pa TV na pa wayilesi.

Mpingo wakwamba wa Chiyowoyero cha Mawoko ukapangika ku Lilongwe mu 2005. Mu 2009, mulimo wa kung’anamura mabuku mu Chiyowoyero cha Mawoko cha ku Malawi ukambika. Kufuma waka pa nyengo iyi kufika sono, pang’anamurika vinthu vyakukwana 34 vya chiyowoyero ichi. Pasono pali ŵanthu 21 awo ŵakuchita mulimo wakung’anamura ndipo ŵali kugaŵika mu magulu ghankhondi.

Yumoza mwa awo ŵakachitako mulimo wa kung’anamura ndipo nayo ngwakumangwa, wakati: “Tikasanganga chandulo na malemba agho ghakang’anamurikanga mu chiyowoyero cha mawoko mu mabuku na mavidiyo ghithu. Kweni pasono tili na mwaŵi wa kusambira vinandi chifukwa tiwonenge mavesi ghose gha mu buku ili ndipo litovwirenge chomene pakusambira patekha kweniso mu uteŵeti.”

Chiyelezgero chimoza chakulongora kuti buku ili lili kung’anamulika makora chomene, ntcha umo mazgu gha pa Mateyu 22:44 ghali kung’anamulikira. Yumoza wa awo ŵakuchita mulimo wakung’anamura wakati: “Mu Mabaibolo ghanyake, mazgu gha pa vesi ili ghali kung’anamulika kuti ‘Fumu yikati kwa Fumu yane.’ Ivi vikapangiskanga ŵanyake kugomezga kuti Yehova na Yesu ni munthu yumoza. Kweni mu buku ili la mu Baibolo, mazgu gha pa vesi ili ghakulongolerathu kuti Yehova ndiyo wakuyowoya na Fumu Yesu.”

Tikulomba kuti mphanyi chawanangwa ichi chawovwira ŵabali na ŵadumbu ŵithu ku Malawi kuti ŵakhozge ubwezi wawo na Yehova uyo ni mupi wa “chawanangwa chilichose chakufikapo.”—Yakobe 1:17.