Kufika mu 2023 vyaka 75 vyajumphapo kufuma apo ofesi ya munthavi yakwamba yikajulikira ku Malawi mu tawuni ya Blantyre mu 1948.

Pakwamba ofesi ya munthavi ya ku South Africa ndiyo yikendeskanga milimo ya Ŵakaboni ŵa Yehova ku Malawi. Kuyambira m’ma 1930, chiŵelengero cha ŵabali na ŵadumbu ku Malawi chikakura kufuma pa 28 mu 1934 na kujumpha pa 5,600 mu 1948. Apo chiŵelengero cha Ŵakaboni chikakuranga, pa September 1, 1948 ofesi ya munthavi yakwamba yikajulika ku Blantyre mu nyumba yichoko ya kuchita lenti. Ofesi iyi yikalutilira kugwira ntchito m’paka apo ofesi yiphya yikazengeka pafupi na malo agha mu 1958.

Pambere vyaka 10 vindakwane mu October 1967, ŵalara ŵaboma ku Malawi ŵakajara ntchito yithu. Ntheura boma likapoka ofesi yithu. Nangauli vikaŵa nthena, ŵabali awo ŵakalaŵiliranga, ŵakalutilira kudangilira pa mulimo wakupharazga kweniso kovwira ŵabali na ŵadumbu mu charu ichi. Kwa vyaka pafupifupi 26 Ŵakaboni ŵa Yehova ŵakamba kutambuzgika chomene na kuŵachitira nkhaza chifukwa chakuti ŵakakana kunjilirapo pa vya ndyali. Pa nyengo iyo ŵabali na ŵadumbu ŵithu ŵakaŵajaliranga mu jele, kuŵatambuzga, kweniso nanga nkhuŵakoma. Ndipo ŵabali na ŵadumbu ŵanyake ŵakachimbilira ku vyaru yapafupi nga nkhu Mozambique, Zambia, na Zimbabwe.

Pa August 12, 1993, boma likazomerezgaso mulimo withu. Kwa vyaka viŵiri, ŵabali ŵa ku Zambia, awo ŵakadangiliranga mulimo ku Malawi, ŵakalutilira kuchita mulimo uwu. Pamanyuma ŵabali ŵakagura nyumba ziŵiri mu tawuni ya Lilongwe izo zikagwiranga ntchito nga ni ofesi ya munthavi yiphya. Ndipo mu 1994, Wupu Wakulongozga ukazomerezga kuti ŵabali ŵasange malo ghawemi kuti ŵamangepo Ofesi ya Munthavi mu charu ichi. Ndipo pa May 19, 2001, ŵabali na ŵadumbu ŵakujumpha 2,000 ŵakaŵapo pa ungano wakujulira ofesi ya munthavi yiphya iyi. Ndipo ŵanandi mwa ŵabali na ŵadumbu aŵa ŵakaŵa kuti ŵazizipizga kwa vyaka vinandi pa nyengo iyo ŵakatambuzgikanga. Mubali Trophim Nsomba, uyo wakaŵa mulaŵiliri wadera mu nyengo iyo mulimo withu ukakanizgika, njumoza mwa ŵanthu awo ŵakaŵapo pa ungano uwu. Pakuwona umo ntchito yakuzenga ofesi yiphya kweniso umo chiŵelengero cha ŵapharazgi chalutira panthazi mu Malawi, Mubali Nsomba wakati: “Yehova watitumbika chomene mwakuti ine na muwoli wane tikuwona nga tikulota!”

Pasono ku Malawi kuli mipingo yakukwana 1,924 ndipo chiŵelengero cha ŵabali na ŵadumbu chikujumpha 109,000. Chiŵelengero ichi chikusazgapo ŵabali na ŵadumbu 225 awo ŵakuteŵetera pa ofesi ya munthavi ya Malawi ku Lilongwe, iyo yikulaŵilira mulimo wakung’anamura mabuku mu viyowoyero 7.

Tikulomba kuti Yehova walutilirenge kutumbika ŵabali na ŵadumbu ŵithu ku Malawi awo ŵalongora kuti mbateŵeti ŵa Chiuta mwakuzizipizga nthambuzgo kwa vyaka vinandi.—2 Ŵakorinte 6:4.