Pa June 5, 2022, Baibolo la Mang’anamuliro gha Charu Chiphya Mateyu-Uvumbuzi likafumiskika mu Chiiban. Ŵabali na ŵadumbu ŵanandi ŵakawungana mu Nyumba za Ufumu kuti ŵawonelere pulogiramu yakujambulikirathu yakufumiska Baibolo ili. Ŵapharazgi ŵanyake ŵakachita kujoyina kwizira pa videoconference. Mabaibolo ghakuchita kupurinta ghambenge kusangika mu July panji August 2022.

Apo ŵakang’anamuranga Baibolo ili, ŵakeneranga kughanaghanira vya mphambano iyo yilipo pa viyowoyero vya Chiiban vya mu vigaŵa vyakupambanapambana. Awo ŵakuchita mulimo wakung’anamura ŵakachema ŵanthu ŵa mu vigaŵa vyakupambanapambana kuti ŵazakaŵazge na kuwona mazgu agho ghangaŵa ghapusu ku ŵanthu awo ŵakuyowoya chiyowoyero ichi.

Baibolo liphya ili liwovwirengeso ŵapharazgi kuti ŵalongosorenge makora unenesko wa mu Baibolo para ŵali mu upharazgi. Mwachiyelezgero, kumasinda uku, chikaŵa chakusuzga ku ŵapharazgi kulongosora lemba la Yohane 4:24, ilo chigaŵa chinyake chikuti: “Awo ŵakumusopa [Chiuta] ŵakwenera kumusopa mu mzimu na unenesko.” Mu Baibolo lakale la mu Chiiban ŵakang’anamura makora viŵi yayi mazgu ghakuti “mzimu” agho ghali pa lemba ili ndipo ghakapelekanga ng’anamuro la “mzimu wa ŵakufwa.” Ivi vikapangiskanga kuŵa chinonono ku ŵanthu ŵakunweka kupulikiska umo ŵakwenera kusopera Chiuta.

Pakuyowoyapo za kuzirwa kwa Baibolo liphya ili, yumoza wa awo ŵakang’anamurako wakati: “Kuŵa na Baibolo la Mang’anamuliro gha Charu Chiphya Mateyu-Uvumbuzi mu chiyowoyero chithu ntchilongolero chakuti Yehova wakuŵatemwa chomene ŵanthu ŵake.”

Tikulomba kuti mphanyi kufumiskika kwa Baibolo liphya ili kwawovwira chomene ŵanthu awo ŵakuyowoya Chiiban, kupulikiska makora Baibolo na kusendelera kwa Chiuta kweniso kulumba zina lake.—Salimo 117:1.