Mwasonosono apa wupu wakuzomerezgeka wakuchemeka Jehovah’s Witnesses in Malta (JW-Malta) walembeskeka mu boma. Wupu uwu ukapokera chikalata chakuti ngwakuzomerezgeka na dango a pa December 28, 2021.

Ŵakaboni ŵa Yehova ŵakamba kusangika mu charu ichi mu ma 1970. Ndipouli kwa vyaka vinandi, mipingo iyo yikaŵamo yikaŵa yakuti yindazomerezgeke na dango. Ivi vikapangiskanga kuti chiŵe chakusuzga kuti mipingo yigure panji kuzenga pa malo ghawo, kweniso nanga kungaŵa kujura akaunti ku banki. Mu 1994, wupu wa International Bible Students Association (IBSA) ku Malta ukaŵa wambura kuzomerezgeka na dango. Nangauli wupu ukaŵa na wanangwa uchoko waka, kweni ukachitanga vinandi yayi. Pakuti pasono wupu wa JW-Malta ngwakuzomerezgeka na boma, chiŵenge chipusu kuti ofesi kweniso mipingo yichitenge vinthu mwakufwatuka chomene ku Malta.

Pakuyowoyapo pa nkhani iyi, Mubali Joe Magri, uyo ngwa mu Komiti ya Charu cha Malta, wakati: “Chipulikano chithu chakhozgeka chomene kuwona umo Yehova watovwilira kuti tiŵe ŵakuzomerezgeka na dango. Iyo wakatovwira kwizira mu ŵabali ŵa mu Dipatimenti ya Vyamalango ku Britain na ku likuru lithu mwakuti vyose ivi vichitike. Ndise ŵakukondwa chomene kuti tilutiskenge panthazi ntchito ya Ufumu na kupeleka uchindami kwa Yehova chifukwa chakuti zina lake likusangikamo mu zina la wupu uphya wakuzomerezgeka uwu.”

Pasono, ku Malta kuli Ŵakaboni ŵa Yehova ŵakujumpha 800 awo ŵakuteŵetera mu mipingo 11. Tikukondwa kuti ntchito ya ‘kupharazga Ufumu wa Chiuta,’ iyo yikamba na mpositole Paulosi vyaka pafupifupi 2,000 kumasinda uku ku Malta, yikulutilira kuya panthazi “kwambura chakujandizga.”—Milimo 28:1, 30, 31.