Pa December 17, 2022, Mubali Louis Breine, uyo ngwa mu Komiti ya Munthavi ya France, wakafumiska Baibolo la Mang’anamuliro gha Charu Chiphya Mateyu-Chivumbuzi mu Chicreole cha ku Mauritius. a Chipharazgo ichi chikapelekeka apo pulogiramu ya kufumiska Baibolo ili yikajambulikirathu ndipo ŵanthu ŵakujumpha 2,200 ŵakawonelera. Baibolo ili likusangika pa intaneti kweniso lakuchita kupulinta.

Chiyowoyero ichi chikuyowoyeka chomene na ŵanthu awo ŵakukhala ku Mauritius, pa chirwa icho chili kumwera kumanjiliro gha dazi kwa Indian Ocean. Chirwa ichi ntchikuru masikweya kilomita 2,007 ndipo chili pa mtunda wa makilomita pafupifupi 800 kumafumiro gha dazi kwa Madagascar. Kukwambilira kwa m’ma 1933, Ŵakaboni awo ŵakafuma ku South Africa ŵakiza pa chirwa ichi kuzakapharazga. Mpingo wakwamba ukapangika mu 1951, ndipo maungano ghakachitikanga mu Chingelezi, chiyowoyero icho ŵanthu ŵanyake ŵakuyowoya ku Mauritius.

Padera pa Baibolo la Mang’anamuliro gha Charu Chiphya Mateyu-Chivumbuzi, pali Baibolo limoza pera mu chiyowoyero cha Chicreole cha ku Mauritius. Kweni mu Baibolo ili mulije zina la Chiuta lakuti Yehova. Mu Baibolo liphya ili la Mang’anamuliro gha Charu Chiphya Mateyu-Chivumbuzi, zina la Yehova likusangika mu malo ghakukwana 237. Kweniso mu Baibolo ili muli mazgu ghapusu ndipo likupulikikwa makora.

Awo ŵakang’anamuranga ŵakaleka dankha mulimo wa kung’anamura mu nyengo ya muliri wa COVID-19. Munyake uyo wakang’anamurako wakayowoya kuti “Tati tambiraso mulimo withu, tikachita na mtima wose. Ntchito ya kung’anamura yikamba kuya panthazi chomene kuluska kumanyuma kose. Ntheura tikamalizga mulimo withu uwu pa madeti agho ghakaŵikika pambere muliri undambe.”

Tili na chigomezgo chose kuti Baibolo liphya ili liwovwirenge ŵabali na ŵadumbu withu kuti ŵalutilire kuŵa paubwezi na Yehova na kumuteŵetera mwakugomezgeka.—Yesaya 65:13.