Wupu Wakulongozga wazomerezga mapulani ghakuti ŵasamuske ofesi ya munthavi ya Central America iyo yili kufupi na Mexico City, Mexico. Komiti ya Vyakuzenga iyo muli ŵabali 5, yili kusoleka kale kuti yilaŵilirenge ntchito yakusamuska ofesi ya munthavi iyi. Komiti iyi pasono yili mukati kufufuza malo ghakwenelera ghakuti kungazengeka ofesi ya munthavi.

Kufumira waka mu 1974, ofesi ya munthavi iyi yanozgekapo na kusanuzgika kanandi waka. Kwambira mu 2011, ofesi ya munthavi ya ku Central America ndiyo yikulaŵilira ntchito za Ufumu ku Belize, Costa Rica, El Salvador, Guatemala, Honduras, Nicaragua, na Panama. a Kuti milimo yose yichitike makora, ofesi yakale iyi yingakhumbikwa kuyikuzgilakoso kweniso kuyinozgaso mu malo ghanandi. Lekani ŵabali ŵakawona kuti ntchiwemi kusanga malo ghanyake na kuzengapo ofesi yiphya iyo pangachitikira milimo yinandi mwakuti milimo ya Ufumu yilute panthazi.

Ndipo ntchito yakusamuska ofesi iyi yichitikenge mu vigaŵa vyakupambanapambana. Chigaŵa chakwamba cha ntchito iyi nkhugura malo na kuzengapo nyumba zakugona kweniso maofesi ghakuti ŵabali na ŵadumbu 300 ŵa pa Beteli ŵangagwiliramo ntchito. Kufuma apo pazamukhumbikwira kuzengaso nyumba zinyake zakugonamo kweniso maofesi ghakugwiliramo ntchito ya mbumba ya pa Beteli.

Mubali Joseph Yi, uyo njumoza wa ŵabali ŵa mu komiti ya vyakuzenga wakati: “Pasono ise pamoza na komiti ya munthavi ya Central America tikupenja malo agho ghangaŵa ghawemi kuti tizengepo ofesi yiphya iyi. Chimoza mwa vinthu ivyo tikuwonaso ntchakuti ŵalaraŵalara ŵaboma kweniso ŵanthu ŵa ku chigaŵa icho tizengenge ŵakondwenge na ntchito yithu. Tili na chigomezgo chose kuti Yehova watilongozgenge pa vyose ivyo tikuchita.”

Ndise wakukondwa chomene kuŵa na ofesi yiphya iyo tizengenge, ndipo tikulomba kuti Yehova watumbike.—Zintharika 16:3.