JANUARY 17, 2023
MEXICO
Baibolo la “Malemba Ghakupatulika mu Mang’anamuliro gha Charu Chiphya” Lamba Kusangika mu Chiyowoyero cha Mawoko cha ku Mexico
Pa January 1, 2023, Mubali Armando Ochoa, uyo ngwa mu Komiti ya Munthavi ku Central America, wakapharazga vya kufumiskika kwa Baibolo la Malemba Ghakupatulika mu Mang’anamuliro gha Charu Chiphya mu chiyowoyero cha mawoko cha ku Mexico (LSM) kuti sono lamba kusangika pa jw.org na pa JW Library Sign Language app. Mubali Ochoa wakapharazga nkhani yakukondweska iyi pa ungano wapadera uwo ukachitikira pa Malo Ghaungano gha El Tejocote.
Mubali (kumalyero) wakung’anamulira pulogiramu ya kufumiskika kwa Baibolo kwa mupharazgi uyo ngwakumangwa na wachibulumutira mu chiyowoyero cha mawoko chakuchita kukhwaskana
Uwu ukaŵa ungano wakwamba wa Ŵakaboni ŵa Yehova kuwungana maso na maso mu chigaŵa cha ofesi ya Munthavi ya Central America kufuma waka apo muliri wa COVID-19 ukambira. Ŵabali na ŵadumbu ŵakukwana 2,317 ŵakawungana maso na maso. Kweniso ŵabali masauzandi ghanandi ku Mexico ŵakawungana mu Malo Ghakuchitiramo Maungano kweniso mu Nyumba za Ufumu ndipo ŵakawonelera pulogiramu yose kwizira pa jw stream.
Kweniso pakawungana Mr. Sergio Peña, uyo ni nkhwantha wa Chiyowoyero cha Mawoko cha ku America na LSM, na Ms. María Teresa Vázquez, uyo ni mulara wa wupu wa Inclusion of People with Disabilities in the State of Yucatan.
Mr. Peña wakayowoya kuti: “Tikuwonga chomene Ŵakaboni ŵa Yehova ku Mexico. Kufika pa January 1, 2023, ŵanthu ŵambura kupulika pasono ŵali . . . na Baibolo lose lanthunthu la LSM. Nilije chakuyowoya, Baibolo linu ili ndiwemi chomene ndipo ndapachanya hooo!’”
Baibolo la Malemba Ghakupatulika mu LSM likamba kung’anamurika mu August 2008, ndipo ŵakamba kung’anamura dankha Mateyu-Chivumbuzi. Kweni mabuku gha mu Baibolo ghakafumiskikanga pachokopachoko mu vyaka 14 ivyo vyajumpha. Ili ni Baibolo lakwamba lanthunthu kufumiskika mu chiyowoyero cha LSM.
Nanga ni mu nyengo ya muliri wa COVID-19, ŵapharazgi ŵakumangwa ŵakasanganga chandulo chomene pakuŵa na mabuku gha mu Baibolo agho ghakaŵa kuti ghafumiskika kale. Mubali munyake wakati: “Nkhawonga chomene pakuti mabuku ghanandi gha mu Baibolo ghakaŵa kuti ghakusangika mu nyengo ya muliri. Yehova wakatipwelelera chomene mwauzimu.”
Mudumbu munyake wakumangwa wakati: “Pambere Baibolo la Mang’anamuliro gha Charu Chiphya mu LSM lindafumiskike, ŵabali ŵakeneranga kuning’anamulira mavesi ghose. Ndipouli chikaŵanga chakusuzga ku ŵabali kuti ŵaning’anamulirenge mavesi munthowa yakuyana waka. Ichi chikaniŵiranga chakusuzga kuti nisungilirenge mavesi gha mu Baibolo pamtima. Kweni pasono nkhuthembaso ŵanthu yayi kuti nipulikiske Baibolo.”
Tili na chigomezgo chose kuti ŵabali na ŵadumbu ŵithu awo mbakumangwa kweniso awo ŵakusuzgikira kupulika ŵasangenge chandulo chifukwa cha kuŵa na Baibolo lawo. Tikulomba Yehova kuti watumbike kuyezgayezga kwawo apo ŵakupharazga uthenga wa “munthazi muwemi na chigomezgo” ku ŵanji.—Yeremiya 29:11.
Panji Mungatemwa Kuŵerengaso Nkhani Izi
IVYO ŴANTHU ŴAKUTEMWA KUFUMBA
Kasi Ŵakaboni ŵa Yehova Ŵali na Baibolo Lawo?
Kuŵerenga Mabaibolo ghakupambanapambana kungamovwirani pakusambira. Pali fundo zitatu izo zikupangiska kuti Baibolo la Mang’anamuliro gha Charu Chiphya kuŵa liwemi chomene para mukusambira.
UMO VYAWANANGWA VINU VIKUGWILIRA NTCHITO
Kupanga Buku Lakuzirwa Kuluska Ghose
Pali vinandi ivyo vikunjizgikamo kuti ting’anamure Mabaibolo gha Mang’anamuliro gha Charu Chiphya, kupulinta, na kughapanga kuti ghaŵe mabuku.
IVYO ŴANTHU ŴAKUTEMWA KUFUMBA
Kasi Ŵakaboni ŵa Yehova Ŵakugomezga Tesitamenti Lakale?
Kasi vigaŵa vinyake vya Baibolo ni vyakovwira yayi mazuŵa ghano? Kasi ni fundo na ulongozgi wuli wakuzirwa uwo Ŵakhristu ŵangawusanga mu Malemba Ghachihebere?