Pa February 27, 2022, Mubali Carlos Cázares, uyo ngwa mu Komiti ya Munthavi ya Central America, wakafumiska Baibolo la pa intaneti pera la Mang’anamuliro gha Charu Chiphya Mateyu-Uvumbuzi mu Chitlapanec. Ghakuchita kupulinta ghambenge kusangika cha kuumaliro wa chaka chino. Pulogiramu ya kufumiska Baibolo ili yikajambulikirathu ndipo ŵanthu pafupifupi 820 ŵakawonelera.

Ntchito ya kung’anamura Baibolo ili yikamba mu July 2020, mu nyengo ya muliri wa COVID-19 yeneyiyi. Munyake uyo wakang’anamurako wakati: “Nangauli tikasangana na masuzgo ghakupambanapambana, kweni chakukondweska ntchakuti tafiska kumalizga ntchito yose mu chaka na hafu. Yehova ndiyo watovwira kuti vyose ivi vichitike.”

Baibolo ili lili na mazgu agho ŵanthu ŵakuyowoya pasono ndipo ndipusu kuŵerenga. Chiyelezgero ni mazgu agho ghali pa Mateyu 5:3. Mabaibolo agho ghakafumiskika kumasinda uku ghakang’anamurika kuti: “Ŵaŵenge ŵakukondwa awo ŵakumanya kuti ŵangachita kanthu yayi kwambura kuti mzimu utuŵa waŵawovwira,” panji “Mbakukondwa awo ŵali na mzimu wakulopwa.” Kweni mu Baibolo la Mang’anamuliro gha Charu Chiphya Mateyu-Uvumbuzi, vesi ili lili kung’anamurika kuti: “Mbakukondwa awo ŵakumanya kuti ŵakwenera kupenja Chiuta.”

Baibolo liphya ili liwovwirenge chomene ŵapharazgi mu uteŵeti. Mu nkhani yake, Mubali Cázares wakati: “Chiuta wankhongonozose wakukhumba kuti ŵanthu ŵapulike uthenga uwemi mu chiyowoyero chawo, icho ŵakuyowoya zuŵa na zuŵa, chiyowoyero chakuti ŵaleke kuchita kusuzgikira kuti ŵapulikiske.”

Nase tikukondwa lumoza na ŵabali na ŵadumbu ŵithu awo ŵakuyowoya Chitlapanec chifukwa cha kufumiskika kwa Baibolo ili apo tose tikuteŵetera Yehova “na mtima umoza.”—Zefaniya 3:9.