Pa July 18, 2021, Mubali Arturo Manzanares, uyo ngwa mu Komiti ya Munthavi ya Central America, wakadumba nkhani yakufumiska Baibolo la Mang’anamuliro gha Charu Chiphya Mateyu-Uvumbuzi mu Chitojolabal.

Chitojolabal chikuyowoyeka na ŵanthu ŵakujumpha 66,000, chomene ku Chiapas, Mexico, na chigaŵa cha kumwera cha kumafumiro gha dazi kwa charu ichi, ku mphaka na Guatemala. Baibolo ili likafumiskika la pa Intaneti ndipo pulogiramu yose yikajambulikirathu kweniso ŵanthu pafupifupi 2,800 ŵakawonelera kwizira pa intaneti.

Apo pulogiramu yikaŵa mukati, uyo wakadumbanga nkhani wakafumba kuti, “Chifukwa wuli tikukhumbikwira Baibolo mu Chitojolabal?” Wakazgora kuti: “Chifukwa ntchakuzirwa kuŵa na Baibolo ilo likupeleka uchindami kwa Mweneko, Yehova.”

Mudumbu munyake uyo wakachitako ntchito yakung’anamura Baibolo ili wakati: “Nkhakhwaskika chomene nati naŵerenga lemba la Yohane 5:28, 29. Mu maghanoghano nkhamba kuwona kuti amama ŵakuwuskika ku ŵakufwa. Nkhaŵerengapo kanandi waka mavesi agha mu Chisipanishi, kweni sono apo nkhuŵerenga mu chiyowoyero chane, ndipo nkhughapulikiska makora chomene. Yewo chomene!”

Apo ntchito yakung’anamura Baibolo yikaŵa mukati, awo ŵakagwiranga ntchito iyi ŵakasama kufuma ku ofesi ya munthavi ya Central America, kufupi na Msumba wa Mexico, kuluta ku ofesi yawo yiphya yakung’anamulirako mabuku ku Las Margaritas, Chiapas. Pasono ofesi iyi yili ku chigaŵa icho ŵakuyowoya Chitojolabal, mtunda wa makilomita 990 kufuma ku ofesi ya munthavi. Pa ofesi iyi, pali ŵateŵeti ŵanyengozose 9 awo ŵakugwira ntchito yakung’anamura, pamoza na ŵabali 5 awo ŵakugwira mu madipatimenti ghanyake. Nangauli ŵanthu awo ŵakuyowoya Chitojolabal mu vigaŵa vyakupambanapambana ŵakupulikana makora waka para ŵakuyowoyeskana, kweni ŵakupambana pachoko mazgu ghanyake agho ŵakugwiliskira ntchito. Awo ŵakang’anamuranga Baibolo ili ŵakaŵikapo mtima chomene kuti ŵang’anamure makora Malemba Ghachigiriki kuti ŵanthu ŵanandi ŵakaleke kusuzgika kupulikiska.

Mwachiyelezgero, mu Mabaibolo ghanyake mazgu ghakuti “Ufumu wa Chiuta” ghali kung’anamulika kuti “malo agho Chiuta wayowoya” panji “tawuni (panji msumba) wa Chiuta.” Kweni mazgu agha ghakupeleka ng’anamuro lililose yayi ku ŵanthu awo ŵakuleka kugwiliskira ntchito mazgu agha. Mu Baibolo la Mang’anamuliro gha Charu Chiphya mu Chitojolabal, mazgu agha ghali kung’anamulika kuti “Boma la Chiuta,” ndipo ngapusu kupulikiska.

Mudumbu munyake uyo wakawonelera pulogiramu iyi wakati, “Ntchakuwonekerathu kuti Yehova wakalongozga waliyose uyo wakachitako ntchito iyi, kuti tiŵe na Baibolo lipusu kupulikiska kweniso lakung’anamulika makora chomene. Nkhugomezga kuti chawanangwa ichi chamuŵafika pamtima ŵanthu ŵanandi awo ŵachali ŵandamumanye Chiuta.”—Milimo 17:27.