Pa August 8, 2021, Mubali José Nieto, uyo wali mu Komiti ya Munthavi ya Central America, wakafumiska Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi, mu Chiyowoyero cha chimixtec (Guerrero). Baibolo ili likafumiskika la pa Intaneti kwizira mu purogiramu iyo yikajambulikirathu ndipo ŵanthu ŵakukwana 785 ŵakawonelera. Ofesi ya munthavi yipurintenge Mabaibolo agha kukwambilira kwa November 2021 na kutumizga ku mipingo mu December 2021 panji January 2022.

Panyengo yakufumiska Baibolo ili, pamanyuma pakuŵerenga lemba la 1 Ŵakorinte 14:9, Mubali Nieto wakayowoya kuti: “Kuti nkhongono ya Mazgu gha Chiuta yiwoneke, Baibolo likwenera kuŵa mu chiyowoyero icho waliyose wangapulika . . . , chiyowoyero icho chikuyowoyeka zuŵa na zuŵa.”

Chimixtec (Guerrero) ntchiyowoyero icho ng’anamuro la mazgu agho munthu wayowoya likusintha kuyana na umo mazgu ghapulikikwira. Chiyowoyero ichi chikuyowoyeka na ŵanthu pafupifupi 150,000 ku chigaŵa cha Guerrero, Mexico, kweniso chikuyowoyekaso na ŵanthu ŵanandi awo chiŵelengero chawo chikumanyikwa makora yayi mu vigaŵa vinyake vya ku Mexico na United States.

Mubali Lázaro González, uyo wali mu Komiti ya Munthavi ya Central America wakayowoya kuti: “Ŵanthu awo ŵakuyowoya chiyowoyero cha Chimixtec (Guerrero) ŵakukhala ku malo uko ŵanthu mbakavu chomene kweniso kukuchitika viwawa. Ndipo muliri wa COVID-19 wapangiska vinthu kuti vihenipirethu. Ivi vyapangiska ŵanthu ŵanandi kuwona kuti Chiuta waŵataya. Kweni kupokera chigaŵa cha Baibolo mu chiyowoyero chawo, mbukaboni wakukwana wakuti Yehova wakuŵaghanaghanira.”

Pambere Baibolo ili lindafumiskike, pakaŵa waka Mabaibolo ghaŵiri gha Malemba Ghachigiriki Ghachikhristu mu Chimixtec (Guerrero). Mabaibolo agha nganonono kuti munthu waghapulikiske chifukwa chakuti ghakang’anamulika na ŵanthu ŵakufuma ku vigaŵa viŵiri vyakupambana. Awo ŵakang’anamuranga ŵakagwiliskira ntchito mazgu agho ghakayowoyekanga chomene mu vigaŵa vyawo pera. Ntheura mu vigaŵa vinyake ntchakusuzga kuti ŵanthu ŵapulikiske para ŵakuŵerenga Mabaibolo agha.

Chiyelezgero chakuti Baibolo liphya ili ndakusuzga yayi kulipulikiska ni umo lemba la Mateyu 5:9 lili kung’anamulikira, ilo likuti: “Mbakukondwa awo mbamtende.” Mu Chimixtec (Guerrero), palije lizgu lakuyanako ndendende na lizgu lakuti “mtende.” Ntheura kuti ng’anamuro leneko lifume, vesi ili likang’anamulika kuti: “Mbakukondwa awo ŵakupenja nthowa za umo ŵangagegera masuzgo.” Ivi vikukolerana na ng’anamuro la lizgu ilo lili ku Chingelezi.

Munthu munyake uyo wakuchita mulimo wakung’anamura wakayowoya kuti: “Limoza mwa malemba agho nkhughatemwa chomene ni 1 Petrosi 1:25, apo pakuyowoya kuti ‘mazgu gha Yehova ghakukhalilira muyirayira.’ Nkhumanya yayi umo umoyo wane mphanyi uliri kuŵavyenge Baibolo, ndipo nkhumuwonga chomene Yehova chifukwa cha kulivikilira kweniso kulisungilira m’paka sono. Ndipo pasono, nase tili nalo mu chiyowoyero chithu cha Chimixtec (Guerrero).”

Munyake uyo nayo wakuchitako mulimo wakung’anamura wakayowoya kuti: “Nkhukayika yayi kuti Yehova wakatovwira na mzimu wake utuŵa. Ndine wakukhorwa kuluska kumanyuma kose kuti viyowoyero ni suzgo yayi kwa Yehova. Watilongoraso kuti Mazgu ghake ‘ngakukakika yayi.’”—2 Timote 2:9.