Vigaŵa vya Tamaulipas na Nuevo León, ku Mexico

• Chimphepo cha Hurricane Hanna, icho chikapangiska kuti kuŵe chivula chankhongono, chikaputa kumpoto cha kumafumiro gha dazi kwa Mexico pa July 26, 2020, ndipo pamanyuma maji ghakatutuka

• Ku Nuevo León, mabanja 14 ghakafumamo mu nyumba zawo pambere chimphepo chindambe

• Mu msumba wa Reynosa, ku Tamaulipas, ŵapharazgi 100 ŵakafumamo dankha mu nyumba zawo

• Nyumba 21 zikanangika ku Nuevo León

• Nyumba 117 zikanangika ku Tamaulipas

• Ofesi ya Munthavi ya Central America yili kupanga Komiti Yakovwira Para Kwachitika Soka

• Ŵalaŵiliri ŵa dera na ŵalara mu vigaŵa ivyo vyakhwaskika ŵakugwilira ntchito lumoza pakupanga ndondomeko yakuti ŵanozge kweniso kupopera munkhwala mu nyumba izo zikakhwaskika na kututuka kwa maji

• Ku Nuevo León, ŵabali na ŵadumbu ŵanandi awo ŵakasama, ŵali kuweleraso mu nyumba zawo

• Ku Tamaulipas, mipingo yikupeleka wovwiri wa chakurya kweniso vyakuvwara ku awo ŵakakhwaskika na soka ili

Tikuwonga chomene Yehova kuti palije yumoza wa ŵabali na ŵadumbu ŵithu uyo wali kupwetekeka na soka ili. Wovwiri uwo ukapelekeka ukulongora waka kuti Dada withu wakuchanya na ŵanthu ŵake nyengo zose mbakunozgeka kuŵa “movwiri wakugomezgeka mu nyengo ya suzgo.”—Salimo 46:1.