Baibolo la Malemba Ghakupatulika mu Mang’anamuliro gha Charu Chiphya Mateyu-Uvumbuzi likafumiskika mu Chindau pa February 28, 2021. Kufika pasono, Baibolo la Mang’anamuliro gha Charu Chiphya likusangika lose panji chigaŵa waka mu viyowoyero 200. Nakutiso pa February 27, buku la mu Baibolo la—Makani Ghawemi Umo Wakalembera Mateyu likafumiskika mu Chichuabo.

Mubali Amaro Teixeira, uyo wakuteŵetera mu Komiti ya Munthavi ya Mozambique, ndiyo wakadumba nkhani za kufumiska Mabaibolo gha pa intaneti pera agha mu mapulogiramu agho ghakajambulikirathu, ndipo ŵapharazgi ŵakawonelera waka. Mapulogiramu agha ghakaŵikikaso pa TV na mawayilesi ghakupambanapambana. Buku la mu Baibolo la—Makani Ghawemi Umo Wakalembera Mateyu lisangikengeso lakuchita kupulinta ndipo liŵenge na mapeji 64, kuti awo ŵalije mwaŵi wakuŵerengera pa vinthu nga ni mafoni na vinyake nawo ŵaŵe nalo.

Chichuabo chikuyowoyeka na ŵanthu 1.4 miliyoni ku Zambezia Province. Ŵapharazgi 492 ŵakuteŵetera mu chigaŵa icho ŵakuyowoya Chichuabo.

Mubali Nicholas Ahladis, uyo wakuteŵetera mu Dipatimenti ya Kung’anamura ku likuru lithu, wakuti: “Tafiska chinthu chapadera na buku la mu Baibolo la Mateyu ilo lafumiskika mu Chichuabo. Buku ilo likaŵapo kale likasuzganga kulisanga kweniso kulipulikiska.”

Chindau chikuyowoyeka chigaŵa cha pakati cha Mozambique na ŵanthu pafupifupi 1.1 miliyoni, kusazgapo ŵapharazgi 1,500.

Apo Baibolo ili likang’anamurikanga mu Chindau, tikasangana na masoka ghakurughakuru ghatatu. Mu 2019, chimphepo cha Cyclone Idai chikasakaza vinthu ku Mozambique. Mu chaka chakulondezgapo, charu cha Mozambique chikasangana na masuzgo agho muliri wa COVID-19 ukambiska, nga umo viliri na vyaru vinyake pa charu chose. Kufuma apo, cha kukwambilira kwa 2021, chimphepo cha Cyclone Eloise chikasakaza vinthu vinandi chomene mu charu ichi. Nangauli pakaŵa masuzgo ghose agha, ŵanthu 5 awo ŵakachitanga mulimo wa kung’anamura Baibolo ili ŵakamalizga ntchito yawo mu vyaka viŵiri na hafu.

Yumoza uyo wakachitako ntchito ya kung’anamura iyi wakati: “Para nkhuwona ivyo tafiska kuchita nangauli tikusangana na masuzgo ghose agha, nkhugomezga yayi kuti tafiska kung’anamura Baibolo ili. Ine nkhuwona kuti uwu ni munthondwe. Patekha mphanyi takwaniska yayi ntchito iyi, nakuti ndivyo tikakhazganga yayi. Uchindami wose ulute kwa Yehova.”

Mubali Ahladis wakulutizga kuti: “Ŵabali ŵithu awo ŵakuyowoya Chindau, kusazgapo awo ŵakuchita mulimo wa kung’anamura, ŵakasangana na vyakujandizga vinandi mwasonosono apa, ndipo ivi vikachedweska ntchito iyi. Kweni pasono, Baibolo lipusu ili la Malemba Ghakupatulika Mateyu-Uvumbuzi ntchawanangwa chapadera ku ŵabali ŵithu ndipo liwovwirenge kuti ŵanthu awo ŵakuyowoya Chindau ŵakhozgeke.”

Mubali Geoffrey Jackson, uyo ngwa mu Wupu Wakulongozga, wakuti: “Awo ŵakuchita ntchito ya kung’anamura Baibolo wose ŵakujipata kweniso kuzizipizga masuzgo ghakupambanapambana. Para tikuwona masuzgo ghose agho ŵakumana nagho awo ŵakang’anamuranga Baibolo la Chindau apo ŵachitanga ntchito yawo, kusazgapo masoka gha chilengiwa, ntchakupulikikwa kuti Baibolo la Malemba Ghakupatulika Mateyu-Uvumbuzi mu Chindau latifikiska pa viyowoyero 200 ivyo Baibolo la Mang’anamuliro gha Charu Chiphya likusangika. Tikugomezga kuti Baibolo ili ntchawanangwa chapadera chomene ku ŵanthu wose awo ŵakuyowoya Chindau ku Mozambique.”

Tikukondwera lumoza na ŵabali ŵithu chifukwa cha kufumiskika kwa Mabaibolo agha mu nyengo ya muliri iyi. Apa ntchakuwonekerathu kuti palije icho chingamutondeska Yehova kufiska khumbo lake.—Yesaya 43:13.