Pa August 15 na 16, 2020, ŵapharazgi ku Mozambique ŵakakondwa chomene kupokera Baibolo la pa intaneti la Malemba Ghakupatulika Mu Mang’anamuliro Gha Charu Chiphya Mateyu-Uvumbuzi mu Chichangana na Chimacua. Ŵapharazgi ŵakujumpha 8,000 ŵakuyowoya Chichangana ndipo ŵanyake ŵakujumpha 1,700 ŵakuyowoya Chimacua.

Mubali David Amorim, uyo ngwa mu Komiti ya Munthavi ya Mozambique, ndiyo wakadumba nkhani ya kufumiska Mabaibolo agha iyo yikajambulikirathu, ndipo ŵapharazgi ŵakachita kuwonelera kwizira pa intaneti. Kweniso ŵabali ŵithu ŵakazomerezgeka kuŵika pulogiramu iyi pa TV na pa mawayilesi ghakujumpha 30.

Ŵanthu pafupifupi 1.9 miliyoni ŵa ku vigaŵa viŵiri vya kumwera chomene kwa Mozambique, ndiwo ŵakuyowoya Chichangana. Chiyowoyero ichi chikuyanako waka na Chitsonga, icho ŵanthu ŵanyake ŵakuyowoya ku South Africa.

Vigaŵa vya kumpoto kwa Mozambique ndivyo kukusangika ŵanthu awo ŵakuyowoya Chimacua. Ŵanthu pafupifupi 5.8 miliyoni ŵakuyowoya Chimacua ndipo ndicho ntchimoza mwa viyowoyero ivyo vikuyowoyeka na ŵanthu ŵanandi ku Mozambique.

Kwa vyaka vinandi, ŵapharazgi ŵa viyowoyero ivi ŵakasuzgikanga chomene kuti ŵasange Baibolo. Mabaibolo ghakaŵa ghakudura, ndipo nyengo zinyake awo ŵakaguliskanga Mabaibolo ŵakakhumbanga yayi kuti ŵaguliske ku Ŵakaboni ŵa Yehova. Yumoza wa awo ŵakagwirako ntchito yakung’anamura wakati: “Mipingo yinyake yikaŵa na Baibolo limoza pera ilo likasungikanga mu Nyumba ya Ufumu ndipo awo ŵali na nkhani kweniso awo ŵali na chakuchitika mu maungano gha mukati mwa sabata ndiwo ŵakaligwiliskiranga ntchito.”

Tikukondwa lumoza na ŵabali na ŵadumbu ŵithu awo ŵapokera Baibolo la Malemba Ghakupatulika, Mateyu-Uvumbuzi mu Chichangana na Chimacua. Tikumanya kuti Mabaibolo agha ghawovwirenge ŵanthu ŵanandi kuti ‘ŵamanye makora unenesko.’—1 Timote 2:3,4.