Pa April 30, 2023, Baibolo la Mang’anamuliro gha Charu Chiphya Mateyu-Chivumbuzi likafumiskika mu Chigitonga pa ungano wapadera uwo ukachitikira ku Maxixe, Inhambane Province, Mozambique. Mubali Wayne Wridgway, uyo ngwa mu Komiti ya Munthavi ya Mozambique ndiyo wakafumiska Baibolo ili ndipo pakawungana ŵanthu ŵakukwana 920. Waliyose uyo wakaŵapo pa ungano uwu wakapokera Baibolo lakuchita kupulinta. La pa Intaneti nalo likamba kusangika kuti ŵanthu ŵachite dawunilodi.

Chiyowoyero cha Chigitonga chikuyowoyeka chomene ku Inhambane Province ku Mozambique. Ŵanthu awo ŵakukhala ku malo agha ŵakumanyikwa chomene chifukwa cha mtima wawo wakupokelera ŵalendo. Chigitonga ntchiyowoyero chakonkhera cha ŵanthu pafupifupi 327,000 kufuma mu vigaŵa vyakupambanapambana mu charu ichi, nga Homoíne, Jangamo, Maxixe, na Morrumbene.

Kumanyuma uku, ŵapharazgi ŵakawona kuti ma Baibolo ghanyake mu Chigitonga ghakaŵa ghakusuzga kupulika. Kweni na Baibolo liphya ili, ŵabali na ŵadumbu ŵithu mbakukondwa chomene kuŵa na Baibolo ilo ndipusu kupulika uthenga wake. Munyake uyo wakang’anamurako Baibolo ili wakati: “Dada wachitemwa wakuyowoya na ŵana ŵake mwakugwiliskira ntchito mazgu ghapusu kweniso ghakupulikikwa makora. Mwakuyana waka, awo ŵakuyowoya Chigitonga ŵapulikiskenge makora mazgu gha Dada withu wachitemwa, Yehova, apo sono ŵali na Baibolo liphya ili.”

Apo wakafumiskanga Baibolo ili, Mubali Wridgway wakati: “Para tikukhumba kuŵa paubwezi wakukhora na Chiuta, ntchakukwana yayi kuyowoya waka nayo zuŵa lililose mu lurombo kweni tikukhumbikwiraso kutegherezga kwa iyo apo wakuyowoya nase kwizira mu Mazgu ghake, Baibolo. Tikumuchiskani kuti mwambepo kuŵerenga Baibolo linu la Mang’anamuliro gha Charu Chiphya Mateyu-Chivumbuzi kwambura kutondeka ndipo muliŵazgenge zuŵa lililose.”

Tikukondwa nawo lumoza ŵabali na ŵadumbu ŵithu chifukwa cha kufumiskika kwa Baibolo liphya ili ndipo tikulomba kuti Yehova walutilire kutumbika mulimo wakupharazga uwo ukuchitika ku chigaŵa icho ŵakuyowoya Chigitonga.—Ŵaroma 12:15.