Pa March 5, 2023, pakafumiskika Baibolo la Malemba Ghakupatulika mu Mang’anamuliro gha Charu Chiphya Mateyu-Chivumbuzi mu chiyowoyero cha Chironga pa ungano wapadera uwo ukachitikira ku National Stadium of Zimpeto, iyo yili ku Maputo, Mozambique. Mubali Castro Salvado, uyo ngwa mu Komiti ya Munthavi ku Mozambique wakafumiska Baibolo ili, ndipo pakawungana ŵanthu ŵakukwana 3,150. Ungano uwu ukaŵa wakwamba kuchitika maso na maso kweniso kuti pafumiskike Baibolo ku Mozambique kufuma waka apo muliri wa COVID-19 ukambira. Waliyose uyo wakaŵapo pa ungano uwu wakapokera Baibolo lakuchita kupulinta.

Chiyowoyero cha Chironga ntchakonkhera ku ŵanthu pafupifupi 618,000 ndipo chikuyowoyeka chomene mu tawuni ya Maputo ku Mozambique. Nangauli Mabaibolo ghanyake ghalipo kale mu chiyowoyero cha Chironga, kweni ghanandi mwa Mabaibolo agha ŵali kugwiliskira ntchito mazgu agho ŵanthu ŵanandi ŵakughapulikiska yayi pasono.

Pakuyowoya vya Baibolo liphya ili, munyake uyo wakang’anamurako wakati: “Nkhuwonga chomene kuŵa na chawanangwa ichi! Nkhumanya kuti ŵabali na ŵadumbu ŵane mbakukondwa chomene chifukwa cha kuŵa na Baibolo lipusu ndiposo lambura kusuzga kuŵerenga. Sono ndipo tipulikenge Yehova kuti wakuyowoya nase mwakudunjika mu mitima yithu.”

Tikukondwa nawo lumoza ŵabali ŵithu chifukwa cha kufumiskika kwa Baibolo ili ndipo tikulomba Yehova kuti walutilire kutumbika wose awo ŵakuyowoya Chironga.—Ŵaroma 12:15.