Pa November 14 na 15, 2020, Buku la mu Baibolo la—Makani Ghawemi Umo Wakalembera Mateyu, likafumiskika la pa Intaneti pera mu viyowoyero viŵiri vya ku chigaŵa cha kumwera kwa Mozambique, Chigitonga na Chironga. Buku la mu Baibolo ili ntchawanangwa cha panyengo yake cha kufuma kwa Yehova ku ŵapharazgi 524 awo ŵakuyowoya Chigitonga na ŵapharazgi 1,911 awo ŵakuyowoya Chironga.

Mubali Amaro Teixeira, uyo wakuteŵetera mu Komiti ya Munthavi ya Mozambique, ndiyo wakadumba nkhani yakufumiska buku ili. Nkhani iyi yikajambulikirathu ndipo ŵapharazgi ŵakawonelera waka. Ŵabali ŵithu ŵakazomerezgekaso kuŵika pulogiramu iyi pa TV na mawayilesi ghakupambanapambana. Chifukwa chakuti ŵanandi ŵalije vinthu vya tekinoloje nga ni mafoni gha Intaneti na vinyake, buku la Mateyu ili lisangikengeso lakupulinta ndipo liŵenge la mapeji 64.

Mubali Teixeira wakalongosora kuti: “Mabaibolo kweniso mabuku ghakulongosora Baibolo gha mu viyowoyero ivi ngakusoŵa chomene. Ndise ŵakukondwa kuti tili na buku la Mateyu mu viyowoyero ivi, chifukwa mu buku ili mukusangika mdauko wa Yesu na kubabika kwake, Upharazgi wake wa pa Phiri uwo ngwakumanyikwa chomene, na mauchimi ghakuyowoya vya mazuŵa ghaumaliro.”

Pakuyowoyapo vya uwemi wa buku lakung’anamurika makora kweniso lambura kusuzga kupulikiska ili, yumoza wa awo ŵakang’anamuranga wakati: “Mu buku la Mateyu muli fundo zinandi zakovwira. Nakuti nkhuwona kuti lamuŵafika pa mtima chomene ŵanthu, chomenechomene para ŵakuŵazga vya Upharazgi wa pa Phiri mu chiyowoyero chawo cha pamtima.”

Kafukufuku wakulongora kuti ŵanthu pafupifupi 224,000, ŵakuyowoya Chigitonga ndipo ŵanyake pafupifupi 423,000 ŵakuyowoya Chironga. Tikugomezga kuti buku la mu Baibolo ili lovwirenge ŵanthu ŵanandi kuti ŵasange nthowa “iyo yikuya ku umoyo.”—Mateyu 7:14.