Pa July 9, 2023, buku la mu Baibolo la Mateyu likafumiskika mu chiyowoyero cha mawoko ku Mozambique, pa ungano wapadera uwo ukachitikira ku Maputo, Mozambique. Buku ili likafumiskika na Mubali Castro Salvado uyo ngwa mu Komiti ya Munthavi ya Mozambique, ndipo ŵanthu ŵakukwana 857 ŵakaŵapo pa ungano uwu, kusazgapo na awo ŵakawonelera kwizira pa vidiyo konferensi. Pasono, buku ili likusangika pa intaneti ndipo mungapanga dawunilodi pa JW Library Sign Language app na pa jw.org.

Mu 2017, mulimo wa kung’anamura buku ili ukambapo ku ofesi ya munthavi ya Maputo. Chilato chikaŵa chakuti ŵang’anamure mabuku ghanyake ghanandi kuti ghawovwire Ŵakaboni ŵa Yehova ŵakumangwa ku Mozambique. Pasono, ŵapharazgi ŵakujumpha 344 ŵakuteŵetera mu mipingo 5 ya chiyowoyero cha mawoko, magulu 12 na tumagulu 10.

Aka nkhakwamba kuti buku la mu Baibolo ili lifumiskike mu chiyowoyero cha mawoko ku Mozambique. Munyake uyo wakang’anamurako wakati: “Ŵanthu awo ŵakuyowoya chiyowoyero cha mawoko ku Mozambique ŵakaŵa kuti ŵandaŵazgepo lurombo lwa chiyelezgero mu chiyowoyero chawo. Ndine wakunweka chomene kovwira awo nkhusambira nawo Baibolo kuti ŵapulikiske kuzirwa kwa lurombo mwakukolerana na Mateyu 6:9-13.”

Tili ŵakukondwa kumanya kuti buku ili liwovwirenge ŵanthu ŵanandi ŵa mitima yiwemi ku Mozambique kusambira “mazgu ghakupatulika gha Chiuta.”—Ŵaroma 3:2.