APRIL 21, 2021
MYANMAR
Kukumbukira Nyifwa ya Khristu mu 2021—Myanmar
Chikumbusko chikachitika Kwizira pa Telefoni mu Nyengo Iyo Kukaŵa Viwawa
Kwamba waka mu February 2021, mu charu cha Myanmar mukamba kuchitika viwawa. Mu masabata ghakuti Chikumbusko cha nyifwa ya Khristu chakhala pachoko kuchitika, mu vigaŵa vyakupambanapambana mu charu ichi mukamba kuchitika viwawa ivyo ŵanthu ŵakalasananga na futi. Ivi vikapangiska kuti ŵanandi mwa ŵapharazgi 5,102 ŵaŵavye mwaŵi wa intaneti. Ŵabali ŵakasanga nthowa yinyake yakuti ŵategherezge nkhani ya Chikumbusko, ŵakagwiliskira ntchito telefoni.
Mu msumba unyake, pa zuŵa la Chikumbusko ŵanthu mu msewu ŵakamba kulasana na futi. Ŵasilikari ŵakamba kusecha mu nyumba za ŵanthu kuti ŵasange awo ŵakachitanga viwoneskero. Ŵabali ŵakapembuzgika na mazgu agho ni lemba la chaka chino gha pa Yesaya 30:15, ghakuti ‘ŵakhale mwakufwasa na kugomezga Yehova.’ Ŵabali ŵakakhala waka mu nyumba zawo, ŵakayowoyeskananga mwakuphwephwerezga, kuchepeskako ungweru, ndipo ŵakachita Chikumbusko kwambura chakutimbanizga chilichose. Nangauli kuli viwawa, kweni mpingo unyake ukaŵa na chiŵelengero chikuru chomene cha awo ŵakachitako Chikumbusko kuluska kumasinda kose. Ŵanandi ŵakajoyina kwizira pa telefoni.
Mu charu chose ichi, ŵanthu 11,877 ŵakachitako Chikumbusko, chiŵelengero ichi chakwera na 14 peresenti kuluska chiŵelengero cha mu 2019.
Tili na chigomezgo chose kuti adada ŵithu ŵakuchanya, Yehova Chiuta, ŵakukondwa para ŵakuwona ŵabali ŵithu ŵakulutilira kuŵikapo mtima kuchita vinthu vyauzimu nangauli kuli viwawa.—Zintharika 27:11.