Chaka ichi cha 2022, chikukwaniska vyaka 100 kufuma apo ofesi ya munthavi yikajulikira ku Amsterdam, msumba ukuru wa Netherlands. Mu mbiri yithu yose, ŵabali na ŵadumbu ŵithu mu charu ichi ŵalongora kuti ŵali na chikanga kweniso chipulikano chakukhora.

Makani ghawemi ghakafika ku Netherlands kukwambilira kwa vyaka vya m’ma 1900, apo munyamata munyake zina lake Heinrich Brinkhoff wakamba kuŵazga buku lakulembeka na wupu wa Watch Tower Society na wa International Bible Students Association. Mwaluŵiro munyamata uyu wakamba kuphalirako ŵanji ivyo wakasambira. Ivyo wakamba kuchita apa vikamba kukura. Mu 1920, Mubali Joseph F. Rutherford wakaŵa na ulendo wakwenda ku Europe ndipo wakajura ofesi ya munthavi ku Switzerland. Ofesi iyi yikalaŵilirangaso mulimo wakupharazga ku Netherlands. Mu 1921, Mubali Rutherford wakimika Mubali Adriaan Block kuti ndiyo walaŵilirenge mulimo wakupharazga ku Netherlands. Mu 1922, ofesi ya munthavi yikajulika ku Amsterdam.

Kujulika kwa ofesi ya munthavi kukapangiska kuti mulimo wakupharazga wende makora. Chiŵelengero cha ŵateŵeti ŵa Yehova chikamba kukura chomene. Nyengo yichoko waka pambere Nkhondo Yachiŵiri ya pa Charu Chose yindambe, mu charu ichi mukaŵa ŵapharazgi ŵamwamphu pafupifupi 500.

Nkhondo yati yamba, charu cha Netherlands chikaŵa pasi pa muwuso wa Nazi. Ŵakaboni ŵa Yehova ŵakaŵa ŵamoza mwa ŵanthu awo ŵakaŵapenjanga chomene kuti ŵaŵatambuzge. Mu nyengo iyi Ŵakaboni ŵa Yehova pafupifupi 300 ŵakaŵafumiska mu charu chawo mwakuchichizga ndipo ŵanandi ŵakaluta nawo mu misasa yakuyuzgirako ŵanthu. Ŵabali ŵithu pafupifupi 130 ŵakafwa chifukwa cha ulwari panji masuzgo ghanyake. Nangauli pakaŵa masuzgo ghose agha, chiŵelengero cha Ŵakaboni ŵa Yehova chikalutilira kukura ku Netherlands, mwakuti apo nkhondo yikamaranga mu 1945, chikaŵa pa 3,125.

Ndipouli, umaliro wa nkhondo ukaŵa umaliro wa masuzgo yayi. Ŵakatolika ŵakimikananga nawo chomene Ŵakaboni ŵa Yehova, chomenechomene kumwera kwa charu ichi. Mwachiyelezgero mu 1952 Tchalitchi la Katolika likayezga kuti litondeske ungano withu ku Venlo. Ivi vikapangiska ŵenecho ŵa malo gha ungano kukanizga Ŵakaboni kuchitira ungano pa malo ghawo. Ŵabali ŵakaŵikapo mtima, ŵakajintha waka mahema pa malo ghanyake na kupanga ungano.

Ŵakususka ŵakalutilira. Nyengo yinyake wumba wa ŵanthu ŵakujumpha 1,000 ukiza kuti uzakatimbanizge ungano. Nanga ŵangaŵa Ŵapolisi nawo ŵakiza kuzakatimbanizga ungano pa sabata chigaŵa cha mise na kukaka ŵabali ŵanyake.

Vyose ivyo ŵakususka aŵa ŵakachitanga vikaŵatonda. Mwakovwirika na ulongozgi wakufuma ku ofesi ya munthavi, ŵabali ŵa maudindo ŵakalutilira kuchitiska ungano.

Yehova wakalutilira kutumbika chikanga cha ŵabali ŵithu. Mu 1983, ofesi ya munthavi ya Netherlands yikasamuskikira ku Emmen. Mu 2022, chiŵelengero cha Ŵakaboni ŵa Yehova ku Netherlands chikaŵa pafupifupi 30,000.

Mbiri ya Ŵakaboni ŵa Yehova ku Netherlands mbukaboni wakuti Yehova ‘wakugwentha yayi panji kuŵasida’ ŵanthu ŵake.—Dotoronome 31:6.