Pa February 12, 2023, Mubali Jeffrey Winder, uyo ngwa mu Wupu Wakulongozga, wakafumiska Baibolo la Mang’anamuliro gha Charu Chiphya Mateyu-Chivumbuzi mu chiyowoyero cha Chipidgin (West Africa) na Chiurhobo. Ŵanthu ŵakukwana 559,326 ku Nigeria ŵakawonelera pulogiramu iyi mu mipingo yawo kwizira pa stream. Nyengo yeneyiyo lati lafuma waka, Baibolo la pa intaneti likamba kusangika kuti ŵanthu ŵachite dawunilodi. Ndipo lakuchita kupulinta lizamwamba kusangika cha kuumaliro kwa 2023.

Mpingo wakwamba kuyowoya Chipidgin (West Africa) ukapangika mu 2015. Kweni pasono kuli mipingo yakujumpha 1,100 ku Nigeria iyo ŵanthu ŵakuyowoya Chipidgin (West Africa) kweniso chikuyowoyeka mu vyaru vinyake nga nkhu England na United States. Kumanyuma uku, mipingo iyi yikagwiliskiranga ntchito Baibolo la Chingelezi la Malemba Ghakupatulika mu Mang’anamuliro gha Charu Chiphya. Mubali munyake wakayowoya kuti: “Kumasinda uku, vikanozganga yayi kupharazgira munthu mu Chipidgin na kumuŵazgira Baibolo la Chingelezi. Nyengo zinyake, uyo tikumupharazgira wakatondekanga kupulikiska fundo yeneko iyo taŵazga. Kweni sono tipharazgenge mu Chipidgin na kuŵerenga Baibolo la Chipidgin. Chifukwa chakuti tizamuŵaŵelengeranga Baibolo mu chiyowoyero chawo chakonkhera, uthenga withu uzamuŵa wakupulikikwa makora chomene.”

Mpingo wakwamba wa chiyowoyero cha Chiurhobo ukapangika mu 1933. Mu 1968, ŵabali ŵithu ŵakang’anamura kabuku kakwamba ka mutu wakuti Living in Hope of a Righteous New World, mu chiyowoyero cha Chiurhobo. Kufuma nyengo yira, chiŵelengero cha mipingo ya Chiurhobo chakwera kufika pa 103. Ntheura kufumiskika kwa Baibolo la Malemba Ghakupatulika mu Mang’anamuliro gha Charu Chiphya Mateyu-Chivumbuzi mu Chiurhobo ni thumbiko likuru chomene ku mipingo iyi. Baibolo ili ndakupulikikwa makora kweniso ndipusu.

Tikulomba kuti mphanyi ma Baibolo agha ghawovwira ŵanthu ŵanandi ‘kuti ŵamanye makora’ Chiuta.—Ŵakolose 1:9.