Pa March 4, 2024, Khoti la Oslo likakolerana na ivyo Boma la Norway likadumura kuti Chisopa cha Ŵakaboni ŵa Yehova ŵachiwuskemo mukawundura wa visopa vyakuzomerezgeka ku Norway. Ŵakaboni ŵa Yehova ku Norway ŵachitenge apilu ivyo khoti lili kudumura.

Kuumaliro wa chaka cha 2022, mwimiliri wa Boma mu chigaŵa cha Oslo na Viken wakawuskamo chisopa chithu mu kawundura wa visopa vyakuzomerezgeka. Pa December 30, 2022, Khoti la Oslo likayimiska dankha ivyo likadumura na chilato chakuti ŵafufuze dankha mwakukwana. Kweni Boma la Norway likuti lilutilirenge kuwona chisopa cha Ŵakaboni ŵa Yehova kuŵa chambura kuzomerezgeka m’paka tizakasinthe dankha na umo tikuchitira pa nkhani ya kuwuskamo ŵanthu ŵambura kupera mu mpingo.

Ivyo boma lili kudumura kuti chisopa cha Ŵakaboni ŵa Yehova chiŵe chambura kuzomerezgeka, vipangiskenge kuti wovwiri wa ndalama uwo boma likupeleka ku visopa vyakuzomerezgeka vyakujumpha 700 utijumphe. Kweniso ivi vipangiskenge kuti ŵatipoke wanangwa wakusankha kweniso kuzomerezga ŵalara awo Mbakaboni ŵa Yehova kukwatiska nthengwa mwakuyana na dango.

Apo tikulindizga umo apilu yenderenge, tikulutilira kulombera “mathemba, na wose awo ŵali na mazaza, mwakuti tikhalenge umoyo wa bata na wakufwasa kweniso kuti tisopenge Chiuta mwakukwana.”—1 Timote 2:1, 2.