Pa December 30, 2022, Khoti Likuru la Oslo likazomerezga ivyo ŵabali ŵakapempha kuti boma lileke dankha kuŵawuskamo Ŵakaboni ŵa Yehova mu visopa vyakuzomerezgeka na dango ku Norway. Fundo iyi yikaŵa yakwenelera chifukwa Mulara wa boma ku Oslo na Viken wakapharazga vyakuti Ŵakaboni ŵa Yehova ŵawuskikemo mu visopa vyakuzomerezgeka na dango. Ivyo tikapempha ku khoti vikatipa mwaŵi kuti tilutilire kuŵa mu kawundura wa boma m’paka apo nkhani iyi ŵazamuyiwoneraso makora ŵa khoti. Kweni ŵa Ministry of Children and Families ŵakakolerana navyo yayi ivyo tikapempha.

Kweni ivyo ŵa khoti ŵakadumura vikovwira chomene ŵabali na ŵadumbu ŵithu, kweniso awo ŵakunozgekera kunjira mu nthengwa. Boma la Norway, likuzomerezga ŵanthu ŵekha awo chisopa chawo ntchakulembeskeka ku boma kuti ndiwo ŵangachita maukwati. Kweni apo boma likati Ŵakaboni ŵa Yehova ŵaŵawuskemo mu kawundura wa visopa, ŵakang’anamuranga kuti ŵaŵengeso ŵakuzomerezgeka yayi kupangiska maukwati. Kweni pakuti pasono khoti lili kuzomerezga pempho lithu vyapeleka mwaŵi kuti awo ŵatoranenge ŵangapangira ukwati wawo mu Nyumba ya Ufumu, ndipo Kaboni wa Yehova wangendeska pulogiramu yose ya ukwati.

Mubali André Bjørnstad na Mudumbu Yasmin de Andrade Montelo awo ŵakunozgekera kuti ŵatoranenge, nawo ŵakakhwaskika chomene na nkhani iyi. Ivyo ŵakayowoya tikaviŵika pamoza na ivyo tikapempha khoti pa December 28, 2022 kuti boma lileke kutiwuskamo mu kawundura wa visopa. Mubali Bjørnstad wakayowoya kuti ŵanji ŵangamba kufumba chifukwa icho iwo mbakukhumbisiska chomene kuti Kaboni wa Yehova ndiyo wakwatiske nthengwa yawo. Iyo wakalongosora kuti: “Ŵanthu ŵakuzirwiska chomene ivyo munthu wakugomezga. Kweni usange ŵanthu ŵakutondeka kuchindika ivyo ukugomezga, vikuŵa nga wamunthu wataya chinthu icho ukwenera kumanyikwa nacho.”

Pambere boma ku Norway lindayowoye vyakuti Ŵakaboni ŵa Yehova ŵaŵawuskemo mu kawundura wa visopa, ŵakamba kutinora ndalama izo boma likatipanga vyaka 30 kumasinda. Boma likupeleka ndalama izi ku visopa vyakujumpha 700 mu charu ichi, ivyo ni vyakuzomerezgeka na dango na chilato chakuti milimo yakukhwaskana na chisopa yendenge makora. Pa December 21, 2022, Ŵakaboni ŵa Yehova ŵakadandawura ku boma la Norway, kuti ŵaghanaghanirepo makora pa nkhani ya ndalama iyi.

Boma la Norway likukolerana navyo yayi ivyo Ŵakaboni ŵa Yehova ŵakugomezga na kuchita pa nkhani ya kusezga munthu. Mulara wa bom mu charu ichi wakasimikizga kuti Ŵakaboni ŵa Yehova ŵakwenera kusintha chigomezgo chawo pa nkhani ya kusezga wakwananga mu mpingo mwakuti chisopa chawo chilutilire kuŵa mu kawundura. Kweni ivyo ŵakuŵayowoyera Ŵakaboni ŵa Yehova apa vikufuma ku nkhwantha yayi panji ku khoti.

Mulara wa boma wakayowoya kuti para tamuwuskanimo mu kawundura wa visopa ndikuti chikung’anamura kuti muŵavyenge wanangwa wa kusopa yayi. Kweni pa milandu yakuyana waka yakukhwaskana na kuwuskamo Ŵakaboni ŵa Yehova mu kawundura wa visopa vyakuzomerezgeka, Khoti Lakuwona vya Wanangwa wa Ŵanthu ku Europe likayowoya kuti uku nkhwanangira chomene wanangwa wa chisopa cha Ŵakaboni ŵa Yehova. a

Mubali Jørgen Pedersen, uyo ngwa mu Komiti ya Munthavi ya Scandinavia wakayowoya kuti: “Ŵakaboni ŵa Yehova ku Norway ŵakuchita milimo yawo yakusopa mwamtende ndipo kufika sono pajumpha vyaka 130. Kweni wanangwa withu ngwakuvikilirika na Malango gha charu cha Norway na wupu wa European Convention on Human Rights. Usange khoti ku Norway ladumura mwakuyana na pempho lithu ndikuti tiŵenge ŵakuvikilirika nakuti mwenecharu waliyose ku Norway wachitenge vinthu mwawanangwa.”