Mubali Kegawale Biyama, wa mu Komiti ya Munthavi ya Papua New Guinea, wakapharazga vya kufumiskika kwa Baibolo la Malemba Ghakupatulika mu Mang’anamuliro gha Charu Chiphya mu Chihiri Motu. Pulogiramu ya kufumiska Baibolo ili yikajambulikirathu ku ofesi ya Ŵakaboni ŵa Yehova ku Port Moresby ndipo ŵanthu ŵakujumpha 7,000 ndiwo ŵakawonelera pulogiramu iyi pa November 28, 2020.

Ku Papua New Guinea ndiko kuli viyowoyero vinandi chomene pa charu chose, kukuyowoyeka viyowoyero pafupifupi 840. Chihiri Motu ntchimoza mwa viyowoyero vitatu ivyo ŵanthu ŵanandi ŵakupulika mu charu ichi. Chikuyowoyeka na ŵanthu pafupifupi 140,000.

Mubali Kukuna Jack, uyo ngwa mu Komiti ya Munthavi wakuti: “Ŵanthu awo ŵakuyowoya Chihiri Motu ŵalindilira Baibolo ili kwa nyengo yitali. Tikugomezga kuti ŵalitemwenge chomene Baibolo la Mang’anamuliro gha Charu Chiphya chifukwa ndakusuzga yayi kulipulikiska.”

Ŵanthu 6 ndiwo ŵakagwira ntchito yakung’anamura Baibolo ili, ilo latora vyaka 10 kuti limare. Yumoza mwa awo ŵakang’anamuranga Baibolo ili wakuti: “Nkhukayika yayi kuti ŵanthu ŵamukondwa chomene kuwona zina la Chiuta mu Baibolo ili kwamba waka mu Genizesi m’paka Chivumbuzi. Tikuwonga chomene Yehova chifukwa cha chawanangwa ichi.”

Para tikughanaghanira vya ntchito yose iyo yachitika kuti m’paka Baibolo ili lifumiskike, tikwamba kujipulika nga ni ntchimi Yesaya iyo yikati: “A Yehova, mutipenge mtende, chifukwa chilichose icho tachita, ndimwe mwatichitira.”—Yesaya 26:12.