Ŵamishonale ŵakwamba kutumika ku Peru ŵakafika mu charu ichi mu October 1946. Ŵamishonale ŵakwambilira ŵakabowozga chigaŵa chikuru cha kupharazgako. Chikaŵa na ŵanthu 7 miliyoni awo ŵakakhalanga mu charu chisani pafupifupi masikweya kilomita 1.3 miliyoni. Kwa vyaka 75 ivyo vyajumpha, ŵamishonale na ŵapharazgi ŵa mu charu ichi ŵakuŵikapo mtima chomene kupharazga kwali nkhu vigaŵa vya kumizi vya Peru ivyo kuli mapiri panji misumba ya mumphepete mwa nyanja, ndipo ŵanthu ŵanandi ŵakusambira unenesko.

Mu vyaka vyakumasinda pambere ŵamishonale ŵandafike, Ŵakaboni ŵa Yehova kufuma ku South America ŵakalutangako mwa apo na apo ku msumba ukuru wa Peru, Lima, ndipo ŵakagaŵiranga mabuku ŵanthu awo ŵakaŵa ŵakunweka. Maulendo agha ghakawa pawaka yayi. Mu 1945, ŵamishonale ŵaŵiri awo ŵakateŵeteranga ku Chile ŵakaluta ku Lima kuti ŵakabatize Ŵakaboni ŵakwambilira ŵatatu mu charu ichi.

Kwamba mu October 1946 kuya munthazi, awo ŵamalizga masambiro gha Giliyadi ŵakatumizgikanga ku Peru kuti ŵakawovwirepo pa ntchito yakupharazga. Ŵakakumana kakwamba na ŵanthu ŵakunweka ku Rimac mu boma la Lima. Apo chiŵelengero cha ŵapharazgi na ŵamishonale chikasazgikiranga mu charu ichi, ntchito yakupharazga yikafika na kuwaro kwa boma la Lima. Pasono yichali kuya munthazi.

Mudumbu Nellena Pool, yumoza mwa ŵamishonale ŵakwambilira awo ŵakafika mu 1946, wakayowoyapo vya kuluta panthazi kwa ntchito yakupharazga ku Peru mu nkhani yakulongosora umoyo wake iyo yili mu Gongwe la Mulinda la March 1, 1957. Iyo wakati: “Nkhusoŵa na mazgu ghakuti niyowoye umo nkhujipulikira para nkhuwona charu icho pakwamba chikaŵa chipalamba ndipo pasono ‘chikuzota nga ni luŵa.’”

Mudumbu Irene Mannings, uyo wakamalizga masambiro gha Giliyadi gha kilasi nambara 54 ndipo wachali kuteŵetera ku Peru, wakati: “Kufuma apo tikizira kuno, tawona umo chiŵelengero cha ŵapharazgi chakwelera kufuma pa 7,000 m’paka kujumpha 130,000. Nkhuwona kuti ni mwaŵi kuchitako chigaŵa chane kovwirapo pa ntchito iyi. Nkhuwonga chomene Yehova chifukwa cha kutumbika ntchito iyi.”

Ŵapharazgi 133,170 awo pasono ŵakuteŵetera ku Peru mbakuwonga chomene chifukwa cha ntchito yakupharazga iyo yikamba kuchitika vyaka 75 ivyo vyajumpha. Mbiri ya Ŵakaboni ŵa Yehova ku Peru mbukaboni wakukwana wakuti layizgo la Yehova ilo lili pa Yesaya 60:22 ili ndaunenesko, ilo likuti: “Muchoko chomene wazamuŵa chikwi, ndipo muchoko wazamuzgoka mtundu wankhongono.”