Mwezi wa April 2024 ngwakuzirwa chomene pa nkhani yakusindikizga mabuku ghakulongosora Baibolo ku Philippines. Vyaka 75 ivyo vyajumpha, mu April 1949, Gongwe la Mulinda lakwamba likamba kusangika mu chiyowoyero cha Chicebuano na Chipangasinan.

Uthenga uwemi wa Ufumu ukafika ku Philippines kukwambilira kwa vyaka vya m’ma 1900. Pakwamba, ŵabali na ŵadumbu ŵithu ŵakagwiliskiranga ntchito mabuku gha Chingelezi mu uteŵeti, kweni vikawoneka kuti pakakhumbikwiranga mabuku gha viyowoyero vya ŵanthu ŵa ku malo agha. Kwambira mu 1947, ŵabali ŵakaŵikapo mtima kwamba kung’anamura Gongwe la Mulinda mu Chitagalog, chiyowoyero icho chikuyowoyeka chomene ku Philippines. Kufuma apo, kuumaliro wa 1948, ŵakanozga kuti Gongwe la Mulinda ling’anamulike mu Chicebuano na Chipangasinan. Pakati pajumpha myezi yichoko waka, magazini ghakwamba ghakasindikizgika.

Kwa vyaka viŵiri vyakulondezgapo, ŵabali ŵithu ŵakagwiliskiranga ntchito kamashini ka mu mawoko kakuchemeka mimeograph pakulemba magazini pa ofesi ya munthavi. Apo ŵanthu ŵanandi ŵakamba kukhumba magazini agha, mulimo wa kusindikizga Gongwe la Mulinda mu Chicebuano na Chipangasinan ukasamuskikira ku Likuru la Ŵakaboni ŵa Yehova, ilo likaŵa ku Brooklyn, New York, U.S.A. a

Ŵabali na ŵadumbu ŵanandi awo ŵakawovwirapo pa mulimo wa kung’anamura Gongwe la Mulinda mu Chicebuano na Chipangasinan ŵakawonga chomene mwaŵi wakuchitako mulimo wa kung’anamura uwu. Mubali Juan Landicho, uyo wakachitako mulimo uwu mu chiyowoyero cha Chipangasinan m’ma 1980, wakati: “Pakwamba Gongwe la Mulinda la Chipangasinan likafumanga myezi 6 pamanyuma pakuti la Chingelezi lafuma chifukwa cha kuchedwa kung’anamulika. Tikakondwa chomene mu 1986 apo nthowa zakung’anamulira zikasintha, ndipo ivi vikapangiska kuti magazini gha Chingelezi na Chipangasinan ghafumiskikenge pa nyengo yimoza. Tikajipulikanga kuti mzimu utuŵa wa Yehova ukulongozga mulimo withu.”

Mudumbu Belen Cañete, wakuteŵetera pa ofesi ya munthavi ku Philippines ndipo wawovwirapo pa mulimo wakung’anamura mu chiyowoyero cha mu Cicebuano kwa vyaka 46. Mwakuyana waka nayo wakayowoya kuti: “Kukwambilira, pakaŵa ŵabali na ŵadumbu ŵachoko chomene pa mulimo wakung’anamura ndipo ntchito yikaŵanga yikuru chomene. Nyengo zinyake vikaŵanga vyakusuzga. Kweni sono tili na gulu lakusambizgika makora chomene kweniso tili na vyose vyakukhumbikwa pa mulimo wakung’anamura. Najiwonera nekha umo Yehova wakusinthira mkuŵa kuŵa golide na kuwoneseska kuti ŵateŵeti ŵake ŵakupwelelereka makora.”

Ŵanthu ŵakujumpha 26 miliyoni ku Philippines ŵakuyowoya Chicebuano, kusazgapo ŵabali na ŵadumbu ŵakujumpha 76,000 awo ŵakuteŵetera mu mipingo 1,150 ya Chicebuano. Kweniso pa ŵanthu pafupifupi 2 miliyoni awo ŵakuyowoya Chipangasinan, pafupifupi 6,000 mbabali na ŵadumbu awo ŵali mu mipingo 68 ya chiyowoyero cha Chipangasinan. Ofesi ya munthavi ya ku Philippines yikulaŵilira mulimo wakung’anamura mabuku ghakulongosora Baibolo mu viyowoyero 24. Pa viyowoyero ivi, mwezi uliwose, Gongwe la Mulinda likusindikizgika mu viyowoyero 10. Pasono, Ofesi ya munthavi ku Japan ndiyo yikulaŵilira ntchito yakusindikizga mabuku ghakulongosora Baibolo mu Chicebuano na Chipangasinan.

Tikuwonga chomene Yehova kuti watumbika mulimo wakung’anamura uwu na kovwira ŵanthu awo ŵakuyowoya Chicebuano na Chipangasinan awo ŵali na nyota yaunenesko kuti ŵamanye Mazgu ghake!—Yesaya 55:1.