Ungano wa pa charu chose wakukhwaskana na viyowoyero, ntchakuchitika icho pakuŵa ŵanthu ŵakupambanapambana nga mbasambizgi, ŵakumanya vya malango, ŵakufufuza vinthu (ŵakusanda vinthu), kweniso ŵanthu ŵakusambira chomene kufuma mu vyaru 12. Ungano uwu ukachitika kwizira pa videoconference kufuma pa February 21 m’paka pa March 20, 2021. Dr. Ricardo Ma. Nolasco wa Dipatimenti Yakukhwaskana na Viyowoyero (Department of Linguistics) pa Yunivesite ya Philippines Diliman, uyo wakaŵa cheyamani pa ungano uwu, wakaŵachema ŵimiliri ŵakufuma ku ofesi ya munthavi ya Philippines kuti nawo ŵaŵepo pa ungano uwu. Pa March 9, 2021, Mubali Elnathan Lee na Mubali Israel Aves, awo wose ŵakugwira ntchito yakung’anamura, ŵakalongosorapo vyakukhwaskana na mulimo wa kung’anamura uwo Ŵakaboni ŵa Yehova ŵakuchita. Ŵanthu 320 ŵakawonelera ungano uwu kwizira pa Intaneti.

Kuyana na ivyo wakayowoya Dr. Ricardo Ma. Nolasco, kafukufuku uyo wakachitika ku Philippines wakalongora kuti buku ilo ŵanthu ŵali kuŵerangapo chomene kupatulako mabuku gha sukulu, ni Baibolo. Lekani chikaŵa chakupulikikwa kuti chigaŵa chinyake cha ungano uwu chikaŵa na mutu wakuti, “Kung’anamulika kwa Baibolo mu Viyowoyero vya ku Philippines.” Ŵabali ŵithu ndiwo ŵakayowoya nkhani iyi.

Mubali Aves wakayowoya nkhani ya mutu wakuti, “Vyaunenesko, Vyambura Kusuzga Kuŵerenga, panji Vyose? Viyowoyero Vyakonkhera na Masuzgo Agho Ghakuŵapo pa Kung’anamura Baibolo.” Wakalongosora umo ŵabali na ŵadumbu awo ŵakang’anamura Baibolo la Malemba Ghakupatulika mu Mang’anamuliro gha Charu Chiphya ŵakachitira kuti ivyo ŵang’anamura viŵe vyaunenesko kweniso vipusu pakuŵerenga. Mubali Aves wakalongosolera awo ŵakategherezganga ungano uwu kuti: “Pakuti ntchito yakusambizga ŵanthu Baibolo ndiyo njakuzirwa chomene, Ŵakaboni ŵa Yehova ŵakuwoneseska kuti Baibolo la Mang’anamuliro gha Charu Chiphya lisangikenge nanga mungaŵa mu viyowoyero ivyo mbanthu ŵachoko chomene awo ŵakuyowoya. Mabaibolo agha ghakusangika gha pa Intaneti panji ghakupulintika mu mipingo ya Ŵakaboni ŵa Yehova ndipo ngaulere mwakuti mungajiwonera mwekha umo awo ŵakung’anamura ŵakuchitira kuti Mazgu gha Chiuta ghaŵe ghaunenesko kweniso ghambura kusuzga pakuŵerenga.”

Mu nkhani ya mutu wakuti, “Kuwunganya Ŵanthu Ŵamitundu Yose na Viyowoyero: Ntchito ya Kung’anamura ya Ŵakaboni ŵa Yehova,” Mubali Lee wakalongosora umo ntchito ya kung’anamura ya Ŵakaboni ŵa Yehova yikuchitikira pa charu chose chapasi. Wakayowoya kuti pali ŵanthu awo ŵakung’anamura ŵakujumpha 6,000 na ŵanyake awo ŵakovwirana nawo kuti ntchito iyi yende makora. Kweniso wakalongosora mbiri ya ntchito yithu ya kung’anamura iyo yikamba m’ma 1890 m’paka sono ndiposo umo yalutira panthazi chomene mu vyaka vya sonosono. Wakayowoyaposo za jw.org, kuti ni webusayiti iyo yili mu viyowoyero vinandi chomene kuluska webusayiti yiliyose pa charu chapasi, iyo mu November 2019, yikaŵa na vinthu vyakung’anamulika mu viyowoyero vyakukwana 1,000.

Mubali Lee wakamalizga nkhani yake na mazgu ghakuti: “Awo ŵakung’anamura mabuku gha Ŵakaboni ŵa Yehova ŵakuwona kuti ntchito yawo njakuzirwa chomene ku ŵanthu lekani ŵakung’anamura vinthu ivyo ni vyakupulikikwa, ivyo ŵanthu ŵangavitemwa, kweniso ivyo vingasambizga na kukhozga waliyose.”

Ndise ŵakukondwa chomene kuŵa na mwaŵi wakuphalirako ŵanthu vyakukhwaskana na mulimo withu wa kung’anamura. Pali ukaboni unandi kuluska kumanyuma kose wakuti makani ghawemi ghakupharazgika ku “mtundu uliwose, fuko lililose, [na] lulimi lulilose.”—Chivumbuzi 14:6.