Pa June 19, 2022, Mubali Przemysław Bobów, uyo ngwa mu Komiti ya Munthavi ya Poland, wakafumiska Baibolo la Mang’anamuliro gha Charu Chiphya, Mateyu-Uvumbuzi mu Chiyowoyero cha Mawoko cha ku Poland. Ŵanthu pafupifupi 1,000 ŵakawonelera pulogiramu yakujambulikirathu yakufumiska Baibolo ili.

Baibolo ili, ilo ndakwamba kufumiskika mu Chiyowoyero cha Mawoko cha ku Poland, likusangika pa jw.org na pa JW Library Sign Language app.

Mubali Bobów wakati: “Ndise ŵakukondwa chomene kuti pasono ŵanthu ŵakumangwa nawo ŵangawonelera nkhani za mu Baibolo zakupambanapambana izo ziŵawovwirenge kuti ŵalondezge makora chomene mendero gha Yesu, na kusendelera kwa Adada ŵithu ŵachitemwa a Yehova.”

Ŵakaboni ŵa Yehova ŵakamba kufumiska mabuku mu Chiyowoyero cha Mawoko cha ku Poland kufuma mu 2004, kwamba na burosha lakuti, Kasi Ncici Ico Ciuta Wakukhumba kwa Ise? Mipingo yiŵiri yakwambilira ya chiyowoyero ichi ku Poland yikapangika mu 2006. Pasono kuli mipingo ya chiyowoyero ichi 13 na magulu 22 kweniso tumagulu tuchokotuchoko.

Tikugomezga kuti kufumiskika kwa Baibolo la Mang’anamuliro gha Charu Chiphya, Mateyu-Uvumbuzi mu Chiyowoyero cha Mawoko cha ku Poland kukukolerana chomene na khumbo la Yehova lakuti “ŵanthu ŵa mitundu yose ŵamanye makora unenesko na kuponoskeka.”—1 Timote 2:4.