Awo ŵakugwira ntchito pa chipatala chinyake ku Słupca, Poland, ŵakalemba kalata yakuwonga ŵabali ŵithu ku Warsaw, chifukwa ŵakapeleka Mabaibolo ku chipatala ichi ŵati ŵapempheka.

Chipatala ichi chikupwelelera ŵalwari ŵanandi ŵa COVID-19. Mulara munyake pa chipatala ichi wakakhumbanga kuŵapa vinthu ivyo vingaŵakhozga awo ŵakugwira ntchito kweniso ŵalwari. Wakakumbuka kuti muwoli wa mubwezi wake zina lake, Helena Krupa, ni Kaboni wa Yehova. Pakukumbuka kuti wakulimbikira chomene kuphalirako ŵanji vya mu Baibolo, wakamuyimbira na kumupempha usange wangamovwira kusanga Mabaibolo ghakuti ghawovwire ŵanthu pa chipatala chawo.

Mudumbu Helena Krupa, uyo wakukhala ku Warsaw, wakaphalira ŵalara ku mpingo kwake vya nkhani iyi. Iwo ŵakanozga katoni yakuti ŵapeleke ku chipatala ichi. Mu katoni iyi mukaŵa Mabaibolo ghakunozgekaso 6, gha Malemba Ghakupatulika mu Mang’anamuliro gha Charu Chiphya na mabuku ghanyake ghakulongosora Baibolo. Ŵabali ŵakalembaso kalata yakulongosora vigaŵa vinyake ivyo vili mu Baibolo la Mang’anamuliro gha Charu Chiphya, chomenechomene chifukwa icho muliri zina la Chiuta lakuti Yehova.

Ŵalaraŵalara ŵa pa chipatala ichi ŵakalembera kalata mpingo uwu ndipo mu kalata iyi ŵakalembamo kuti “ŵakuwonga chomene kufumira pasi pa mtima chifukwa cha wovwiri, kujipeleka na kuŵa wakunozgeka kuchitapo kanthu pa vyakukhumba vya ŵanji.” Kalata iyi yikatiso: “Mu nyengo yakusuzga iyi, apo waliyose wakufipa mtima chifukwa cha umoyo wake, mbumba yake, ŵabwezi ŵake na ntchito, kweni imwe mwasanga nkhongono kuti mughanaghanire ŵanji . . . Kumanya fundo yakuti tili tekha yayi mu nyengo yakusuzga iyi, kwatipa nkhongono kuti tilutilire kulimbana na muliri uwu kweniso masuzgo agho tikusangana nagho zuŵa na zuŵa apo tikuchita ntchito yithu.”

Mazgu agho ghali mu kalata yakuwonga iyi, ghakulongora umo tikuchitira kuti tikhozge ŵanji na kuŵapa chigomezgo kwizira mu vinthu ivyo Yehova watipa.—Ŵaroma 15:4.