MAY 18, 2022
POLAND
Kukakhozga Ŵabali Awo Ŵakujipeleka ku Poland na Awo Ŵachimbira ku Ukraine
Kwamba pa Sabata, May 1, 2022, Mubali Mark Sanderson uyo ngwa mu Wupu Wakulongozga wa Ŵakaboni ŵa Yehova, pamoza na ŵabali ŵatatu awo ŵakuteŵetera mu Komiti ya Munthavi, ŵakaluta kukakhozga ŵabali na ŵadumbu awo ŵachimbira nkhondo ku Ukraine na kwiza ku Poland. Pa ulendo wose uwu, Mubali Sanderson na ŵabali awo wakaŵa nawo lumoza ŵakachezganga na ŵabali na ŵadumbu awo ŵachimbira kwawo na kuŵasimikizgira kuti Wupu Wakulongozga ukuŵatemwa chomene ndipo ulutilirenge kuŵawovwira.
Kumazere kuya kumalyero: Tomasz Wolczko wa mu Komiti ya Munthavi ya Poland, Mark Sanderson, Vesa Väänänen wa mu Komiti ya Munthavi ya Poland, na Tommi Kauko wa mu Komiti ya Munthavi ya Finland
Kudumbiskana vyakukhwaskana na ntchito yakovwira ŵanji pa boda
Kwa mazuŵa 6, ŵabali aŵa ŵakenda ulendo wakujumpha makilomita 2,500, ndipo ŵakachezga na ŵabali awo ŵachimbira kwawo mu vigaŵa vyakupambanapambana. Vigaŵa ivi vikusazgapo malo ghakuchitira maungano ghakurughakuru ghanayi na Nyumba za Ufumu zinandi. Ŵakakumanaso na ŵabali ŵakujipeleka awo ŵakaŵa pa boda ya pakati pa Poland na Ukraine.
Mubali munyake wa ku Ukraine wakati, “Ulendo wa ŵabali aŵa ukatikhozga chomene, vikaŵa nga kuti tamwa tumaji twakuzizima makora mu nyengo ya kotcha.”
Mudumbu munyake wa ku Ukraine wakati, “Tikakhazganga yayi kuti ŵabali ŵangiza kuzakatiwona! Yehova wakutipwelelera nadi.”
Mudumbu munyakeso wa ku Ukraine wakati, “Tikati tafika ku Poland, tikaŵavya kalikose, kweni tikuwonga Yehova, pasono tili na chilichose chakukhumbikwa.”
Gulu la madilayivara na ŵanyake awo ŵali kujipeleka lili pawaro pa malo ghakuchitira maungano ghakurughakuru ku Stęszew, Poland
Ŵabali aŵa ŵakakumanaso na gulu la ŵabali ŵakujipeleka ilo likawovwiranga awo ŵachimbira kwawo. Mubali Sanderson wakaŵasimikizgira kuti Wupu Wakulongozga ukuŵatemwa chomene ndipo wakakora mazgu gha pa Ŵahebere 6:10 na kulongosora kuti Yehova ‘wazamuluwa yayi mulimo wawo.’ Wakatiso, “Nase tizamuluwapo yayi.” Ŵabali ŵakujipeleka aŵa ŵakati mbakukondwa chomene kuti ŵali na mwaŵi wakovwira ŵabali na ŵadumbu ŵawo.
Kwendera ŵadumbu ŵachekuru ŵakufuma ku Ukraine pawaro pa Nyumba ya Ufumu ku Radymno, Poland
Mubali Vesa Väänänen, uyo ngwa mu Komiti ya Munthavi ya Poland, wakati: “Chikaŵa chakukhozga chomene kuwona umo Yehova wakatovwiliranga. Iyo wakapelekanga nkhanira ivyo vikukhumbikwa kwizira mu ulongozgi wa panyengo yake wakufuma ku Wupu Wakulongozga na mzimu wakujipeleka wa ŵabali na ŵadumbu awo ŵakovwira ŵanji.”
Ŵabali ŵakujipeleka mu Holo ya kuchitiramo maungano ghakurughakuru ku Stęszew, Poland, uko ŵakupakilira katundu wakovwilira ŵanji
Apo ŵabali na ŵadumbu ŵithu ŵakulutilira kovwirana, vilije kanthu kuti kwali vinthu vili wuli pa umoyo wawo, ŵakujiwonera ŵekha kufiskika kwa mazgu gha Yesu ghakuti munthu wakuŵa wakukondwa chomene para wali na mtima wakupa.—Milimo 20:35.
