Pa January 7, 2020, ku Puerto Rico, kukachitika chindindindi chikuru ndipo pamanyuma vindindindi vinyake vichokovichoko vikachitikaso. Pa January 11, mulenji, kukachitikaso chindindindi chikuru chomene pa chirwa ichi.

Ŵanandi awo ŵakukhala ku chigaŵa icho chakhwaskika chomene na chindindindi, ŵachali kukhala kwambura magesi, ndipo ŵanandi ŵali kuchimbira mu nyumba zawo chifukwa chakopa kuti chindindindi chinyake chingachitikaso. Lipoti lakufuma ku ofesi ya munthavi ya United States likuti palije yumoza wa ŵabali ŵithu uyo wapwetekeka panji kufwapo chifukwa cha chindindindi ichi. Ndipouli, ŵabali na ŵadumbu 248 ŵali kuchimbira mu nyumba zawo. Nyumba za ŵapharazgi 8 zili kunangikirathu, 70 zili kunangika pachoko waka. Ndipo Nyumba za Ufumu 10 nazo zili kunangika. Komiti ya Kovwira para kwachitika masoka pamoza na ŵalaŵiliri ŵadera ŵakupeleka wovwiri wakuthupi na wauzimu ku awo wakhwaskika na soka ili.

Nangauli ŵabali ŵithu ŵali mu suzgo, kweni ŵakulutilira kusopa Yehova. Mubali Robert Hendriks, uyo wakuteŵetera mu Dipatimenti Yakusindikizga Nkhani ku ofesi ya munthavi ya United States wakayowoya kuti: “Chindindindi chikuchitika bweka yayi kuno ku Puerto Rico, ntheura vindindindi ivi vyapangiska ŵabali na ŵadumbu ŵanandi kuti ŵambe kwenjerwa. Ndipouli ndise ŵakukondwa kuti ŵabali ŵithu ŵakuwelera nyuma yayi chifukwa cha vindindindi ivi. Para mwaŵi wasangika, ŵakuluta ku maungano kweniso ŵakunjira mu uteŵeti nangauli ŵalije magesi panji maji. Ŵalara ŵakuchita ntchito yikuru chomene yakovwira na kukhozga awo ŵakukhumbikwira wovwiri.”

Tikukhozgeka chomene kuwona umo ŵabali ŵithu aŵa ŵakulongolera kuwonga chakurya chauzimu icho ŵakupokera nangauli ŵakukumana na soka la chilengiwa ili. Tikulomba kuti Yehova walutilire kuŵapa mtende wa mu maghanoghano.—Salimo 119:165.