SEPTEMBER 20, 2023
ROMANIA
Kujulira Malo Ghakuchitirapo Ungano na Ofesi ya Munthavi iyo Ŵayikuzga ku Romania
Pa 26 August , 2023, ŵakajulira Malo Ghakuchitirapo Ungano ku Turda Romania kweniso nyumba zitatu izo ŵali kuzenga pa ofesi ya munthavi ku Bucharest, Romania. Mubali Gage Fleegle, wa mu Wupu Wakulongozga ndiyo wakayowoya nkhani yakujulira vinthu ivi. Pakaŵa ŵanthu 1,702 apo wakayowoyanga nkhani iyi kweniso ŵanyake 14,101 awo ŵakajoyina kwizira pa vidiyokonferesi.
Pa ungano uwu, ŵategherezgi ŵakaphalirika za mdauko wa umo mulimo wakuzenga vinthu vya ufumu ukambira mu Romania kweniso umo Yehova watumbikira milimo iyo ŵabali na ŵadumbu ŵakuchita. Pa chakuchitika ichi ŵakachezgaso na ŵabali na ŵadumbu awo ŵateŵeterapo mu magulu ghakupambanapambana ghakuzenga. Ungano uwu ukati wamara, mudumbu Iaela Drăghici uyo wakovwirapo pa mulimo wakuzenga ku Malo Ghakuchitirako Ungano gha Turda wakayowoya kuti: “Ndine wakukondwa chomene kuti nyumba izi zikupelekeka kwa Yehova na chilato chakuti zichindikenge zina lake.” Kweniso mubali Bruce Dyer uyo wakujipeleka kuluta kulikose kukawovwirapo pa mulimo wa vyakuzenga wakati: “Tikuwonga chomene chifukwa cha mwaŵi wapadera uwo tili nawo wakovwirapo pa mulimo wakuzenga uwu. Tikumuwonga chomene Yehova chifukwa cha Lusungu lwake lukuru ulu.”
Ŵabali na ŵadumbu ŵakukwana 1,702 ŵakiza pa ungano wakujulira Malo Ghakuchitirapo Ungano ku Turda
Pa nyumba ziphya izo zazengeka pa ofesi ya munthavi, pali kilasi ilo pasono ŵakuligwiliskira ntchito kusambiliramo Sukulu ya Ŵapharazgi ŵa Ufumu ndipo chigaŵa chinyake mukugona awo ŵakuteŵetera pa Beteli. Kweniso pali ofesi ya awo ŵakung’anamura mabuku, Nyumba ya Ufumu na malo ghanyake. Malo ghasono ghakuchitirapo Ungano agha mukati mungakwana ŵanthu 1,200 ndipo kuwaro kungakwana ŵanthu 1,350. Malo agha ghakovwira ŵabali na ŵadumbu pafupifupi 15,000 kufuma mu vigaŵa vyakupambanapambana mu charu ichi.
Wumba wa ŵanthu ŵakukwana 23,968 ukawungana ku Cluj-Napoca, Romania kupulikizga pulogiramu yapadera pamanyuma pa ungano wakupatulira vinthu ivyo vili kuzengeka. Kachithuzi kachoko: Ŵabali na ŵadumbu ŵakolera chipepara icho mu Chiromania palembeka kuti “Tikumutemwani!”
Ungano uwu ukalutilira ndipo pa 27 August kukaŵa pulogiramu yapadera ku sitediyamu mu msumba wa Cluj-Napoca. Ndipo kukiza ŵanthu wakukwana 23,968. Pulogiramu iyi yikang’anamulika mu Chingelezi, Chiromany, Chiyowoyero cha mawoko cha ku Romania, Chirussia, Chiyowoyero cha mawoko cha ku Russia na Chiukraine ndipo pulogiramu iyi yikalongorekaso mu mipingo yose ku Romania na Ukraine. Ŵanthu wose kusazga pamoza ŵakakwana 121,411.
Tikukondwera lumoza na ŵabali na ŵadumbu ŵithu ŵa ku Romania apo nyumba izi zapelekeka kwa Yehova ndipo zikhozgerenge kusopa kutuŵa.—Yesaya 2:3.
