Kwa vyaka 17 sono, ŵabali ŵithu ŵakudumbanga nkhani zakufuma mu Baibolo sabata yiliyose ku ŵakayidi ŵa ku jele la Jilava Bucharest, Romania. Muliri wa COVID-19 wati wamba, ŵakaleka kuchita nthena maso na maso. Kweni kwati kwakhala masabata ghaŵiri kuti Chikumbusko cha nyifwa ya Yesu chichitike pa March 27, 2021, ŵalara ŵa jele ŵakazomerezga kuti maungano ghambeso kuchitika kwizira pa videoconference. Ŵabali ŵithu ŵakapempha ŵalara ŵa jele usange ŵangazakachita Chikumbusko mwakugwiliskira ntchito nthowa iyi. Ŵalara ŵa jele ŵakazomera. Ŵakayidi 21 na ŵalara ŵa jele ŵanayi ŵakachitako chikumbusko.

Mubali Corneliu Cepan ndiyo wakadumba nkhani ya Chikumbusko mu Chiromaniya. Mubali Angelos Karamplias wakang’anamulira nkhani iyi mu Chigiriki kwa ŵakayidi ŵanyake awo ŵakuyowoya Chigiriki. Ŵalara ŵa jele ŵanayi kusazgapo wachiŵiri kwa mulara wa jele, nawo ŵakachitako Chikumbusko.

Mubali Cepan wakuti : “Nkhawona kuti uwu ni mwaŵi ukuru kuti nidumbe nkhani ya Chikumbusko. Ŵakayidi ŵakategherezga mwakupwelelera chomene ndipo ŵakaghanaghanirapo vya sembe yakuzirwa chomene iyo Yesu wakaŵapa.”

Mubali Karamplias wakuti: “Ndise ŵakukondwa chomene kuti Yehova wajura nthowa kuti tipharazgire ŵakayidi na kuchita Mugonero wa Fumu. Tili na chigomezgo chose kuti panthazi apa ŵakayidi ŵanandi ŵazamwamba kusambira Baibolo kwizira pa pulogiramu ya pa kompyuta na kupembuzgika na malemba.”

Ndise ŵakukondwa kuti ŵalara ŵa jele ŵakaŵapa mwaŵi ŵakayidi kutegherezga nkhani ya Chikumbusko.—1 Timote 2:3, 4.