Mu June 2020, mu tawuni ya Rodna ku Transylvania, Romania, mukalokwa chivula chikuru icho chikapangiska kututuka kwa maji. Nyumba za ŵabali ŵithu 6 zikanangika. Pa June 27, 2020, mulaŵiliri wa dera ku Rodna, pamoza na ŵabali ŵalara ŵa mu tawuni iyi, ŵakapanga ndondomeko yakuti ŵabali na ŵadumbu 25 ŵakufuma mu mipingo yitatu yapafupi ŵalute kukawovwira ŵabali mwaluŵiro. * Meya wa mu chigaŵa ichi wakawona ivyo ŵabali ŵithu ŵakachita ndipo wakaŵalumba chomene apo wakayowoyangapo pa TV yinyake ya mu chigaŵa ichi.

Tawuni ya Rodna yili kufupi na madambo ghanandi. Maji agho ghakatutukira mu tawuni iyi ghakiza na mathipa ghanandi agho ghakapangiska kuti chiŵe chakusuzga kwenda. Nyumba ya mudumbu munyake yikaŵa ku chigaŵa icho meya wa tawuni ya Rodna na ŵanthu ŵake ŵakatondekanga kuti ŵafumiskeko mathipa. Ŵabali ŵithu ŵakati ŵafika, ŵakawovwirapo kusezga mathipa agho ghakaŵa ku malo agha kuti ŵajumphe makora na kuluta kukanozga nyumba ya mudumbu wa mu chigaŵa ichi. Ivyo ŵabali aŵa ŵakachita vikawovwira kuti meya na ŵanthu ŵake nawo ŵafiske makora ntchito yawo yakovwirapo pa masoka.

Paumaliro, meya uyu wakalumba ŵabali ŵithu apo wakayowoyangapo pa TV yinyake ya mu chigaŵa ichi. Iyo wakati: “Nkhukhumba niyowoyepo vya chinthu chinyake chambura kuluwika icho changunikhwaska chomene. . . . Pa zuŵa lakwamba tikagwiliskira ntchito vimagalimoto vikuruvikuru viŵiri kuti tifumiskemo mathipa mu misewu, kweni tikatondeka kumalizga chifukwa vinthu vikanangika chomene mu chigaŵa ichi. Zuŵa lakulondezgapo, [ŵanthu] ŵakujipeleka waka ŵakujumpha 30 . . . ŵakatovwira ndipo ŵakaŵa Ŵakaboni ŵa Yehova. Apo tikafikanga cha ku mise tikaŵa kuti tamalizga kufumiskako mathipa.” Meya uyu wakamalizga na mazgu ghakuti: “Ŵanthu aŵa ŵakatovwira chomene kuti tikwaniske kufumiskako mathipa ku chigaŵa ichi. Nkhuŵawonga chomene wose!”

Meya uyu wakalembaso mazgu ghakuwonga ŵabali ŵithu pa webusayiti. Wakati: “Mphanyi Yehova wamutumbikani mose na kumupani umoyo utali, umoyo uwemi, na kumovwirani kuti mufiske kuchita vinthu viwemi vinandi kunthazi uku!”

Ivyo vikachitika ku Romania ivi, ntchimoza mwa viyelezgero vinandi ivyo vikulongora kuti nkharo yithu yiwemi yikovwira kuti Adada ŵithu ŵakuchanya, Yehova, ŵapike uchindami.—1 Petrosi 2:12.