Pa September 28, 2021, tizamukwaniska vyaka 75 kufumira apo Ŵakaboni ŵa Yehova ŵakaŵira na ungano wa chigaŵa wakwamba ku Romania. Ungano uwu ukachitika pakati pajumpha nyengo yichoko waka kufuma apo Nkhondo Yachiŵiri ya pa Charu Chose yikamalira kweniso panyengo iyo nthambuzgo yakofya yikaŵa kuti yichali mukati. Nangauli ŵakususka ŵakayezgayezga kuti ŵatondeske ungano uwu, kweni ŵabali na ŵadumbu ŵakachita ungano ndipo ŵakasangwa nawo chomene.

Ungano ukachitika pa September 28 na 29, 1946, ku Roman Arenas mu msumba wa Bucharest. Ŵabali ŵa ku Romania ŵakapanga hayara sitima ya pa mtunda kuti yikanyamure ŵabali na ŵadumbu ŵanyake awo ŵakaŵa ŵalendo kuti ŵalute nawo ku ungano. Kweni mulara munyake wamazaza wa tchalitchi la Orthodox wakapanga nthowa yakuti sitima iyi yiyimenge mu malo umo yikeneranga yayi kuti yiyime na chilato chakuti yikafike mwakuchedwa.

Ŵabali awo ŵakaŵa kale mu msumba uwo mukachitikira ungano ŵakamba kwiza pa siteshoni ya sitima nyengo ya 9:00 mulenji pa Chinkhondi kuti ŵapokelere Ŵakhristu ŵanyawo, pambere zuŵa la ungano lindafike chifukwa sitima yikeneranga kufika nyengo ya 10:00 mulenji. Nangauli sitima yikachedwa kufika, kweni ŵabali na ŵadumbu ŵakagongowa yayi. M’malo mwake, ŵakalindilira mwakuzikira m’paka 6:00 namise apo sitima yikafikiranga.

Chifukwa chakuti nkhondo yikasakaza nyumba zinandi chomene, pakaŵa nyumba zichoko waka izo ŵabali na ŵadumbu ŵakeneranga kugonamo. Mwachiyelezgero, ŵabali ŵakagura mapekesi na kuyathandazga pawaro pakapinga pa nyumba ya mubali uyo wakakhalanga kufupi na uko kukachitikira ungano. Kukaŵa kuti kukuthukira, ntheura ŵabali ŵakagona makora waka pawaro kwambura suzgo lililose.

Pa Chisulo ku chigaŵa cha ku mulenji pakaŵa ŵanthu pafupifupi 3,400. Aŵo ŵakaŵapo ŵakapulika kuti Gongwe la Mulinda lambirengeso kupangika mu Chiromania na Chihungaria. Panyengo ya ungano, ŵabali ŵakagaŵira magazini pafupifupi 1,000 agho ghakafuma pakwamba ku ŵabali na ŵadumbu awo ŵakiza pa ungano. Magazini agha ghakaŵa na nkhani zakusazgikira izo ŵabali na ŵadumbu ŵakeneranga kuŵerenga mwakuti ŵamanye fundo zinyake izo zikaŵajumpha mu nyengo ya nkhondo.

Pa Sabata kukiza ŵanthu pafupifupi 15,000 kuti ŵazakategherezge nkhani ya chisanisani . Ŵanyake mwa ŵanthu awo ŵakiza, ŵakaŵa ŵalaraŵalara ŵa boma ŵa ku Romania, ŵapolisi, kweniso ŵasembe ŵa tchalitchi la Orthodox ndipo ŵakavwara minjilira yawo. Ŵabali ŵakaphalirika kuti mulara munyake wa tchalitchi wanozga ndondomeko yakuti waŵike madiramu gha mafuta kufupi na malo gha ungano mwakuti ghazakaphulike panyengo iyo pulogiramu ya ungano yili mukati. Ndipouli, ŵabali na ŵapolisi ŵakatondeska kuti chiŵembu ichi chichitike.

Panyengo iyo pulogiramu yikaŵa mukati, yumoza mwa ŵasembe awo ŵakiza wakakhumbanga kukwera pa pulatifomu, kweni ŵabali ŵakamukanizga. Mubali wakamuphalira wasembe uyu kuti: “Palije chifukwa chakuti wasembe wa Orthodox walutire kunthazi na kuyowoyapo pa ungano uno, kweni mwapokelereka na mawoko ghaŵiri ndipo mukwenera kukhala pasi na kutegherezga.” Wasembe uyu wakawerezgaposo yayi kuti watimbanizge ungano. Pamanyuma, wakwimira boma pa milandu wa ku Romania, wakaŵawonga chomene ŵabali ŵithu chifukwa cha kunozga ungano uwemi.

Mubali Vasile Sabadâş uyo pasono wali na vyaka 96 ndipo nayo wakaŵapo pa ungano uwu wakayowoya kuti, nangauli ŵabali na ŵadumbu ŵithu ŵakakumana na nthambuzgo, kweni ŵakathera yayi. Iyo wakati: “Nkhukumbuka yayi kuti nkhachitapo wofi nanga pangaŵa pachoko waka. Nthambuzgo yikaŵa suzgo yayi. Ŵabali ŵakazgoŵera kale kutambuzgika. Ŵakachitangapo wofi yayi na pachoko.”

Vasile wakatiso ungano ukawovwira chomene ŵanthu ŵa Yehova ku Romania kuti ŵaŵe ŵakukolerana. Ŵanthu ŵanandi ŵakamba kusambira Baibolo na kubatizika mu nyengo ya nkhondo. Chifukwa chakuŵa ŵaphya mu unenesko, ŵanyake ŵakagaŵanika pa nkhani ya umo ŵakawoneranga nkhondo. Kweni pamanyuma pa ungano, Vasile wakati: “Ŵabali ŵakalekana kuti mbakukolerana kweniso mbakukondwa.” Wakayowoyaso kuti: “Nkhakhumbanga nga kuti ungano ungalutilira waka. Chikaŵa chakusuzga chomene kuyowoya ku ŵabali na ŵadumbu kuti tizamuwonana.”

Mazuŵa ghano, ŵabali na ŵadumbu ku Romania ŵakusopa kwambura nthambuzgo yiliyose. Mu 2020, mu charu cha Romania mukaŵa Ŵakaboni ŵa Yehova ŵakujumpha 39,000 ndipo mu 2021, ŵanthu ŵakujumpha 100,000 ŵakaŵapo pa Chikumbusko cha nyifwa ya Khristu. Ichi ntchiŵelengero chiphya cha ku Romania.

Tikuŵawonga chomene ŵabali na ŵadumbu ku Romania chifukwa chakuti ŵakatonda suzgo lililose mwakuti ŵalutilire kuwungana. Tikumuwonga chomene Yehova chifukwa cha kutumbika na kuvikilira ŵanthu ŵake panyengo ya ungano wambura kuluwika.—Ŵahebere 10:24, 25.