Pa August 28, 2021, pamanyuma pakuti Khoti Lakuwona vya Wanangwa wa Ŵanthu ku Europe lapempha ŵalara ŵa boma la Russia, Mubali Aleksandr Lubin na Anatoliy Isakov ŵakafumiskika mu jele ilo ŵakaŵasunganga. Nangauli ŵabali wose ŵaŵiri ŵakutondeka kuchita vinthu vinyake chifukwa chakuti mbalwari chomene, kweni ŵakakakika kwa mwezi umoza na hafu ku Chigaŵa cha Kurgan ku Russia. Vikuwoneka kuti ŵabali aŵa ŵangapika chilango chakuti ŵakagwire jele para mulandu wawo wazakeruzgika.

Pa July 13 na 14, 2021, ŵamazaza ku Chigaŵa cha Kurgan ŵakasecha nyumba zinandi za Ŵakaboni ŵa Yehova. Mubali Isakov, uyo wali na vyaka 56, na Mubali Lubin, uyo wali na vyaka 65, nawo ŵakaŵa mu gulu la Ŵakaboni awo ŵakaluta nawo kukaŵajalira mu selo.

Mubali Lubin wali na nthenda ya mu misempha, BP, na nthenda iyo yikwamba chifukwa chakuti chivikiliro cha muthupi chamba kuwukira viŵaro vinyake. Zuŵa lililose wakukhumbikwira mphepo za okusijini kwa maora 16 na munkhwala unyake wakovwira kuti wajipulikeko makora, kweni ŵakamukanira vyose ivi. Wakusuzgikira pakwenda ndipo wangawuka yayi kwambura wovwiri wa munthu munyake. Muwoli wake, Tatyana, nayo ngwakupendera ndipo wakakolekapo na sitiroku maulendo ghanayi.

Mubali Isakov wali na kansa ya mu ndopa, kweniso viwangwa vinandi vya mu msana na mbambo vili kuphyoka, ndipo wakukhumbikwira kwenda pa kanjinga ka ŵakupendera. Apo ŵakamusunganga mu jele, ŵakamukanira kulutizga kupokera munkhwala wa kansa (chemotherapy). Ŵakamukaniraso kupokera munkhwala wakuchepeska ulwilwi. Chachitima ntchakuti Mubali Isakov wakasangikaso na COVID-19 mu jele mwenemumo.

Kwa masabata ghanandi, maloya ghakayezga kuchita apilu kuti ŵabali ŵaŵiri aŵa ŵafumiskike mu jele umo ŵakaŵasunganga, kweni khoti likakananga. M’malo mwake, ŵeruzgi ŵakabisamiranga ku chikalata icho madokotala gha ku Chipatala cha Kurgan Regional Clinical ghakapeleka, ndipo chikatenge Mubali Lubin na Isakov ŵalije masuzgo agho ghangaŵatondeska kukhala mu jele.

Pa August 8, 2021, maloya agha ghakachita apilu nkhani iyi ku Khoti Lakuwona vya Wanangwa wa Ŵanthu ku Europe. Kufuma apo, Khoti ili likapempha Ofesi ya Wakwimira Boma pa Milandu ya Russia. Pa August 24, 2021, ŵabali ŵaŵiri aŵa ŵakatumikaso ku Chipatala cha Kurgan Regional Clinical. Ulendo uwu, madokotala ghakati Mubali Lubin na Isakov ŵali nadi na masuzgo agho ghangaŵatondeska kukhala mu jele umo ŵakasungikanga.

Tikuŵalombera ŵabali ŵaŵiri aŵa, awo ŵakulutilira kugomezgeka nangauli ŵakutambuzgika kweniso mbalwari. Tikumanya kuti Yehova walutilirenge kuŵalongora “nkhongono zake” kuti ŵalutilire kuzizipizga.—2 Midauko 16:9.