FEBRUARY 21, 2022
RUSSIA

Ŵabali Ŵakakhozga Chipulikano Chawo Chifukwa cha Kovwirika na Ŵakaboni Ŵanyawo

JULANI

Khoti la Petrozavodsk ilo lili ku Republic of Karelia lipelekenge chigamuro chake sonosono apa pa mulandu wa Mubali Maksim Amosov, Mikhail Gordeev, Nikolay Leshchenko, na Dmitriy Ravnushkin. Wakwimira boma pa milandu wachali wandapemphe chilango icho ŵangapika.

Nyengo

July 31, 2019

Ŵa FSB ŵakasecha nyumba na ku ntchito kwa Ŵakaboni ŵa Yehova 16
August 2, 2019

Wakufufuza milandu wakamukanizga Maksim kufuma mu charu cha Russia. Ŵamazaza ŵakamujulira mulandu Nikolay na kumukanizga kufuma mu chigaŵa icho wakakhalanga
August 6, 2019

Wakufufuza milandu wakati Maksim na Nikolay ŵali na “mulandu” chifukwa ŵakasambiranga Baibolo
September 5, 2019

Ŵa FSB ŵakamukaka Mikhail apo wakaŵa ku ntchito kwake na kumupoka kompyuta yake. Wakufufuza milandu wakamujulira mulandu Mikhail
September 20, 2019

Ŵa FSB ŵakakasecha uko Dmitriy wakugwira ntchito na kumupoka foni yake. Wakufufuza milandu wakamufumba mafumbo Dmitriy kwa maora ghanayi, kumujulira mulandu, na kumukanizga kufuma mu chigaŵa icho wakakhalanga
October 18, 2021

Khoti likamba kutegherezga mulandu

Vyakukhwaskana na ŵanthu aŵa

Mikhail Gordeev

Chaka cha kubabikira: 1959

Mbiri yake: Wakutemwa kushuwa na kutegherezga sumu

Kufuma waka apo wakaŵa muchoko, wakaŵa na mafumbo ghakukhwaskana na Chiuta kweniso chifukwa icho tiliri na umoyo. Muwoli wake wakwamba wakafwa apo mwana wawo mwanalume wakaŵa wachali muchoko. Apo wakapenjanga wovwiri kuti wapembuzgike, wakasangana na Kaboni wa Yehova ndipo wakamanya zina la Chiuta. Wakasanganaso na Ŵakaboni pati pajumpha vyaka vinandi ndipo nyengo yeneyiyo wakazomera kusambira Baibolo. Wakabatizika mu 1996

Wakatorana na Yelizaveta mu 1999. Ŵali na ŵana ŵaŵiri ŵanakazi awo ŵachali kukhala nawo

Ivyo Wakayowoya

Kasi mukachita vichi kuti mbumba yinu yinozgekere nthambuzgo?

Pamanyuma pakuti boma lakanizga milimo yithu, . . . Nkhamanya kuti ivi viyezgenge chomene chipulikano chithu. Ntheura nkhaŵikapo mtima kukhozga chipulikano chane kweniso cha ŵamumbumba yane. Nyengo zose tikaŵazgiranga lumoza Baibolo na kulombera lumoza, kupempha kuti Yehova watipe chikanga. Tikaŵazgangaso nkhani zakulongosora umo ŵabali na ŵadumbu ŵithu ŵakazizipizgiranga.

Kasi mungakumbuka nyengo yinyake apo mukawona kuti Yehova wamovwirani mu nthowa yapadera?

Pati pajumpha mwezi kufuma apo ŵamazaza ŵakasechera nyumba yane, [ŵakufufuza milandu] ŵakiza ku ntchito kwane na kunikaka. Ŵakaluta nane kuti ŵakanifumbe mafumbo ndipo ŵakaniphalira mulandu uwo napalamura. Apo ŵakanifumbanga mafumbo, ŵakufufuza milandu aŵa ŵakayezga kunofya. Ŵakati ŵanitumenge ku jele lakusungirako awo milandu yawo yinderuzgike para nkhukana kuyowoya vya ŵabali na ŵadumbu ŵane. Iyi yikaŵa nyengo yakusuzga chomene. Nkhalomba kwa Yehova na kumupempha vinjeru na nkhongono. Iyo wakanovwira kuzizipizga kweniso kuti nileke kuthera na kuŵaphalira vyakukhwaskana na ŵabali na ŵadumbu ŵane.

Nikolay Leshchenko

Chaka cha kubabikira: 1962 (Poltava, Ukraine)

Mbiri yake: Wakatorana na Svetlana mu 1984. Mu 1988, ŵakasangana na banja la Ŵakaboni, pa nyengo iyi wakaŵa msilikari ndipo wakagwiliranga ku Poland. Mu 1989, ŵakachitako kakwamba Chikumbusko cha Nyifwa ya Yesu. Mu 1993, ŵati ŵawelera ku Russia, ŵakamba kusambira Baibolo ndipo kuumaliro wa chaka ichi ŵakabatizika

Ivyo Wakayowoya

Kasi ni mwawuli umo Yehova wamovwilirani pa nyengo iyi mukukanizgika kwenda?

Cha kuumaliro kwa 2019, nkhamba kusuzgika chomene maghanoghano. Svetlana wakaluta ku ungano wa chigaŵa uwo ukachitikira ku Warsaw, Poland. Wakasangana na ŵabwezi ŵithu ŵanyake awo pa nyengo iyo ŵakakhalanga ku Poland. Wakapangana nawo kuti nichezge nawo kwizira pa videoconference. Nkhukumbuka makora yayi ivyo ŵakayowoya, kweni nkhajipulika makora chomene nati nayowoyeskana waka nawo. . . . Nkhuwona kuti Yehova ndiyo wakapangiska kuti ivi vichitike mwakuti wanovwire kujipulika makora.

Tili ŵakukondwa pakuwona ŵabali na ŵadumbu ŵithu ku Russia ŵakulutilira kwenda mu unenesko nangauli ŵakutambuzgika.—3 Yohane 4.

a b Tikatondeka kumufumba.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI