JUNE 7, 2022
RUSSIA

Ŵabali Ŵakuzizipizga Chifukwa cha Kuthemba Yehova

JULANI

Khoti la Babushkinskiy ilo lili ku Moscow lipelekenge chigamuro chake sonosono apa pa mulandu wa Mubali Ivan Chaykovskiy, Yuriy Chernyshev, Vitaliy Komarov, Sergey Shatalov, na Vardan Zakaryan. Wakwimira boma pa milandu wachali wandapemphe chilango icho ŵangapika.

Nyengo

November 24, 2020

Ŵamazaza ku Russia ŵakasecha nyumba 20 za Ŵakaboni ŵa Yehova ku Moscow. Ŵakatora Ivan, Yuriy, Vitaliy, na Sergey na kuluta nawo kukaŵasunga dankha mu jele ndipo ŵakaŵaŵika mu maselo ghakupambana. Ŵamutolamakani ŵakaŵapo apo ŵamazaza aŵa ŵakasechanga nyumba za ŵabali kweniso kufumba mafumbo Yuriy na mbumba yake. Ivyo ŵamutolamakani aŵa ŵakajambura ŵakaviwoneska pa nkhani izo zikaŵikika pa TV ya boma mu charu ichi
November 26, 2020

Sergey wakafumiskika mu jele na kutumika pa jele la panyumba. Vardan, uyo pakwamba ŵakaluta nayo ku chipatala chifukwa cha kupwetekeka apo ŵakasechanga nyumba yake, ŵakamusamuskira ku jele linyake uko ŵakamusunga mu selo yayekha
November 27, 2020

Khoti likati Ivan, Yuriy, na Vitaliy ŵafumiskike mu jele na kutumika pa jele la panyumba
November 30, 2020

Ŵamazaza ŵakafumiska Vardan mu jele na kumutuma pa jele la panyumba, kufuma apo mubali uyu wakalemba dandauro na kulituma ku ofesi ya wakwimira boma pa milandu pa nkhani ya nkhaza izo ŵakamuchitira
February 16, 2022

Khoti likamba kutegherezga mulandu wawo

Vyakukhwaskana na ŵanthu aŵa

Vitaliy Komarov

Chaka cha kubabikira: 1976 (Moscow)

Mbiri yake: Wakaŵa bwana ku ofesi ya ku Moscow ya Russian Television and Radio Broadcasting Network. Wakutemwa ulimi wa njuchi

Wakatorana na Yelena mu 1999. Wakakhorwa kuti Baibolo likuneneska chifukwa cha kuwona umo mauchimi ghake ghakufiskikira. Wakabatizika mu 2003

Ivyo Wakayowoya

Kasi mwasambira vichi mu nyengo yakusuzga iyi?

Nyengo yichoko waka pambere ŵandanikake, nkhaŵa kuti nawonelera vidiyo ya mutu wakuti, Ivyo Ŵawukirano Ŵakufumba, Kasi Nichitenge Vichi pa Umoyo Wane? (Young People Ask—What Will I Do With My Life?) Nkhakondwa chomene na chigaŵa icho mubali muchekuru wakalongosoranga ivyo wakasambira apo wakaŵa ku msasa wakuyuzgirako ŵanthu. Wakakhumbikwiranga vinthu vinandinandi yayi. Wakaŵa waka na mbale na sipuni mbwenu, kweni wakaryanga na kuŵa wamoyo. Pa zuŵa lachiŵiri nati najalirika ndipo nkhajiwonera nekha umo fundo iyi yikanikhozgera. Nkhatandara mu khoti zuŵa lose ndipo nkhaweleranga ku selo yane 9 koloko usiku, apa ndikuti ŵanthu ŵarya kale chakurya chamise. Munyane uyo tikaŵa selo yimoza wakanipa kapu yake kuti nkhayezge kupempha maji ghakotcha ku ŵalinda mwakuti nipange tiyi. Nyengo yeneyiyo nkhakumbuka vidiyo iyo nkhawonelera. Pa nyengo iyi, kapu ya tiyi ndiyo yikaŵa yakuzirwa chomene kuluska kuŵa na galimoto panji foni, vinthu ivyo pakwamba nkhawonanga kuti ningakhara yayi kwambura ivyo.

Sergey Shatalov

Chaka cha kubabikira: 1969 (Stavropol, Chigaŵa cha Stavropol)

Mbiri yake: Apo wakaŵa muchoko wakatemwanga kuseŵera chess, table tennis, na volleyball. Wakaŵapo msilikari, ndipo ngwakupendera chifukwa wakapwetekeka kwenekuku ku usilikari. Wakugwira ntchito yakupelekera katundu

Iyo na Yelena ŵakatorana mu 1995 ndipo ŵakabatizika kuumaliro wa chaka chenechichi

Ivyo Wakayowoya

Ntchivichi chikumupani chigomezgo kuti Yehova walutilirenge kumovwirani kuzizipizga masuzgo agha?

Nili na chigomezgo chose kuti Yehova Chiuta wakupulika malurombo agho ŵabali pa charu chose ŵakunilombera. Vili nthena chifukwa waka cha ivyo nkhusambira mu Baibolo yayi, kweni chifukwa cha chimwemwe na mtende wa mtima uwo nili nawo pasono.

Kasi mukalomba vichi kwa Yehova, ndipo ivi vyamovwirani wuli?

Kanandi waka nkhulomba kwa Chiuta kuti wanovwire kuŵa na chikanga nga ni nkhalamu. Para ningaŵa na chikanga ichi, ningawopa yayi munthu waliyose panji vinthu viheni ivyo vikunichitikira. Nkhulomberaso ŵabali ŵane awo ŵali mu jele, mbumba zawo, kweniso ŵanyake awo nangauli ŵali mu jele yayi pasono, kweni nawo ŵakusangana na masuzgo ghakuru chomene.

Tikukhozgeka chomene kuwona kuti Yehova wakusendelera pafupi na ŵabali na ŵadumbu ŵithu na mbumba zawo chifukwa chakuti iwo ŵakulutilira kuŵikapo mtima kusendelera kwa iyo.—Yakobe 4:8.

Panji Mungatemwa Kuŵerengaso Nkhani Izi

NKHANI

Ŵajalirika mu Jele Chifukwa cha Chipulikano Chawo—Russia

Ŵa Federal Security Service (FSB) ŵakakaka Dennis Christensen chifukwa cha kuchitako maungano gha mtende gha Ŵakaboni ŵa Yehova ku Oryol, Russia.

NKHANI