Pa October 5, 2020, * Khoti la Zasviyazhsky ilo lili mu Msumba wa Ulyanovsk, lizamupeleka chigamuro chake pa mulandu wa Mubali Aleksandr Ganin, Khoren Khachikyan, Andrey Tabakov, na Mikhail Zelenskiy, pamoza na Mubali Sergey Mysin na muwoli wake, Nataliya. Wose ŵangazakeruzgika kuti ŵakagwire jele, kwamba vyaka vitatu mpaka vyaka 7. Wakwimira boma pa milandu wapempha khoti kuti liŵapoke magalimoto na ndalama zawo izo pamoza zikukwana madola 20,000 gha ku America.

Aleksandr Ganin

• Chaka cha kubabikira: 1957 (Ekhabi, ku Chilwa cha Sakhalin)

• Mbiri yake: Wakabatizika na kuŵa Kaboni wa Yehova vyaka 20 ivyo vyajumpha. Sono wali kupumura ntchito ndipo wakutemwa kupwelelera maluŵa

Khoren Khachikyan

• Chaka cha kubabikira: 1985 (Yerevan, Armenia)

• Mbiri yake: Wali na digiri pa vyachuma. Apo wakaŵa munyamata wakachitanga maseŵera gha wrestling. Sono wakumanyikwa kuti ni munthu wakuzikira kweniso walusungu

• Wakamba kusambira Baibolo na Ŵakaboni ŵa Yehova chifukwa wakakhumbanga kuti wamumanye makora Chiuta na kulondezga fundo zake. Wakukondwa chomene chifukwa wali kumanya kuti Baibolo likuneneska ndipo fundo zake zikususkana yayi

Sergey Mysin

• Chaka cha kubabikira: 1965 (Kulebaki, ku Chigaŵa cha Nizhny Novgorod)

• Mbiri yake: Wakasangana na muwoli wake, Nataliya apo wakasambiranga vya uinjiniya, ndipo ŵakatorana mu 1991. Ŵateŵetera lumoza Yehova vyaka vyakujumpha 20, ndipo ŵali na ŵana ŵaŵiri. Wakutemwa maseŵera, chomene gha lacrosse

Nataliya Mysina

• Chaka cha kubabikira: 1971 (Leningrad, uko sono kukuchemeka Saint Petersburg)

• Mbiri yake: Ŵapapi ŵake ŵakaŵa ŵasilikari. Wakakhalanga ku Germany pambere wandamalizge masambiro ghake gha vya munkhwala. Wakutemwa chomene kuphika

Andrey Tabakov

• Chaka cha kubabikira: 1973 (Minsk, Belarus)

• Mbiri yake: Wakugwira ntchito yakukhwaskana na vya tekinoloje. Ŵakatorana na Marina mu 2006. Ŵakasambira Baibolo na Ŵakaboni ŵa Yehova na kubatizika. Sono wakutemwa chomene kunozga mawayiresi na makompyuta

Mikhail Zelenskiy

• Chaka cha kubabikira: 1960 (Bulaesti, Moldova)

• Mbiri yake: Wakendeskanga boti kweniso wakaŵa dilayivala wa mathiraki. Ŵakatorana na Victoria mu 1989. Ŵakamba kusambira Baibolo mu vyaka vya m’ma 1990. Ŵakamba kumutemwa chomene Yehova ndipo pamasinda ŵakabatizika

Pafupifupi vyaka vitatu ivyo vyajumpha, ŵa Federal Security Service (FSB) ŵakamba kuchita kafukufuku ndipo ŵakajamburangaso ivyo ŵabali na ŵadumbu ŵithu ku Ulyanovsk ŵakayowoyeskananga pa foni. Pa February 24, 2019, ŵa FSB ŵakamba kupa mulandu Mubali Khachikyan, Mubali Tabakov, na Mubali Zelenskiy pamoza na mbumba ya Mubali Mysin.

Pakati pajumpha mazuŵa ghatatu, nyengo ya 5 koloko mulenji, ŵapolisi ŵakasecha mwakuchichizga nyumba ya Mubali Khachikyan, Mubali Tabakov, na Mubali Zelenskiy. Ŵabali ŵithu ŵatatu aŵa ŵakaŵakaka na kuŵaŵika dankha mu selo. Mulenji wenewuwo Mudumbu Mysina wakapokera foni. Uyo wakamuyimbira wakati galimoto ya mudumbu uyu yanangika chomene, ndipo wakatiso iyo na mfumu wake, Sergey, ŵafumire kuwaro. Apo Mubali Mysin wakati waka jure chijaro, nyengo yeneyiyo ŵa FSB ŵakanjira mu nyumba. Ŵa FSB ŵakasecha palipose ndipo ŵakaŵapoka vinthu vyawo nga ni mafoni, matabuleti na vinyake. Paumaliro mbumba iyi ŵakayikaka.

Zuŵa lakulondezgapo, Khoti la Leninsky ku Chigaŵa cha Ulyanovsk likati Mubali Mysin wakhale dankha mu jele kulindilira zuŵa la mulandu wake. Kweni mudumbu Mysina pamoza na ŵabali ŵatatu ŵakaŵatuma pa jele la panyumba.

Mubali Mysin wakakhala mu jele mazuŵa 55 ndipo mazuŵa ghanyake 123, wakaŵa pa jele la panyumba. Mudumbu Mysina pamoza na Mubali Khachikyan, Mubali Tabakov, na Mubali Zelenskiy ŵakakhala pa jele la panyumba mazuŵa 50 panji 55.

Pa May 15, 2019 mulenji, ŵa FSB ŵakanjira mu nyumba ya Mubali Ganin na kusecha palipose pamasinda na kumukaka. Ŵakamusunga dankha mu jele kwa mazuŵa ghaŵiri.

Pasono ŵapharazgi wose 6 aŵa, boma likuŵakanizga dankha kuchitako vinthu vinyake. Ndipouli, ŵalaraŵalara ŵa boma ŵakulutilira kuŵatambuzga ŵabali ŵithu. Kweniso ŵali kujara akaunti ya ku banki ya Mubali na Mudumbu Mysin uko kuli ndalama pafupifupi madola 6,313, gha ku America kweniso akaunti ya Mubali Tabakov uko kuli ndalama pafupifupi madola 7,575 gha ku America.

Apo ŵabali na ŵadumbu ŵithu ku Russia ŵakulutilira kusangana na vinthu vyakuyezga chipulikano chawo, tikulomba kuti mphanyi mazgu gha wamasalimo agha ghalutilira kuŵakhozga: “Chiuta ntchiphokwero chithu na nkhongono zithu, movwiri wakugomezgeka mu nyengo ya suzgo.”—Salimo 46:1.